նախընտրելի դարձնել
Արևին նվիրված զոհաբերության զբոսայգին (Ռիթան) Չինաստանի մայրաքաղաք Պեկինի հենց սրտում է: Դա Երկնային կայսրության մայրաքաղաքի ամենագրավիչ վայրերից մեկն է ամբողջ տարվա ընթացքում զբոսանքի, պարերի, սպորտի, ցի գունի (չինական ավանդական հոգեֆիզիկական՝ շնչառական, շարժողական և մեդիտացիոն վարժություններ -խմբ.) և բնության գրկում հանգստի համար (ֆոտոռեպորտաժ):
Զբոսայգին բավական մեծ տարածք է զբաղեցնում: Այն Պեկինի զբոսայգիների մեծ մասից տարբերվում է նրանով, որ այցելուների համար անվճար է:
Զբոսայգու պատմությունը սկսվում է 1530 թվականից, երբ այն կառուցվել է Արևի տաճարի շուրջ: Ըստ ֆեն Շուիի կանոնների՝ Մին դինաստիայի օրոք Չինաստանի մայրաքաղաքում կառուցվել են չորս տաճարներ, որոնցից յուրաքանչյուրը խորհրդանշել է երկնային մարմիններից մեկը՝ Արևը, Լուսինը, Երկիրը (Դիտան) և Երկինքը (Տյանտան): Զբոսայգու Ռիտան կենտրոնական մասն արևային զոհասեղանն է՝ մի վայր, որտեղ անցյալում զոհաբերության ծեսեր են անցկացվել։
Զբոսնելով խնամված ծաղկանոցներով շրջապատված կոկիկ սալարկված արահետներով՝ այցելուները կարող են հասնել գեղատեսիլ լճակներ, որոնցում աճում են շուշաններ և լոտոսներ: Այստեղ հանգստացողները կերակրում են ձկներին, իսկ երբեմն էլ սիրողական ձկնորսությամբ զբաղվում։
Այգում կան խաղահրապարակներ, ժայռամագլցման պատ, ընդարձակ մարգագետիններ օդապարուկ թռցնելու համար, ինչպես նաև տարածքներ արևելյան պրակտիկաներով զբաղվելու և ավանդական երաժշտական գործիքներ նվագելու համար։ Զբոսայգին լայն ժողովդրականություն է վայելում և աչքի է ընկնում բարձր հաճախելիությամբ։ Բացի դրանից, այստեղ պարբերաբար ծաղիկների ցուցահանդեսներ և երաժշտական միջոցառումներ են անցկացվում։
Խորեն Գրիգորյանը՝ Պեկինից
