Ռուսաստանի Ռոստովի մարզի բնակիչ, բազմազավակ հայր Սամվել Բաղմանյանը հրդեհի ժամանակ մարդ է փրկել։ Նա չի վախեցել մտնել տուն, որն արդեն լիովին այրվում էր, գրում է «Կոմսոմոլսկայա պրավդա» թերթը։

Հրդեհը տեղի է ունեցել Իշնյա ավանում, որը գտնվում է Մեծ Ռոստովից մի քանի կիլոմետր հեռավորության վրա։ Սկզբում Սամվելը պայթյունի ձայն է լսել, շուրջն է նայել և տեսել կրակը։ Անմիջապես վազել է դեպի այրվող տունը, որտեղ բնակիչ էր մնացել։

Դռնով ներս մտնել չի հաջողվել, ուստի տղամարդը ներս է մտել պատուհանից։ Չնայած կրակին ու ծխին, որոնք արդեն լիովին տիրում էին ներսում, Սամվելին հաջողվել է գտնել մարդուն և դուրս բերել նրան։

«Սամվել Բաղմանյանի սխրանքը քաջության, ոգու արիության և քաղաքացիական պարտքի իրական զգացումի օրինակ է։ Մի պահ, երբ շատերը շփոթվել էին, նա ընտրեց գործողությունը՝ դրսևորելով համարձակություն և վճռականություն», - ասել են Ռոստովի մարզի վարչակազմում։