Հայաստանի Հանրապետության և Ճապոնիայի միջև «Եկամուտների կրկնակի հարկումը բացառելու և հարկերից խուսափելը կանխելու մասին» կոնվենցիայի վավերացումը բխում է մեր շահերից։ Այս մասին սեպտեմբերի 8-ին Ազգային ժողովի նիստում՝ համապատասխան նախագծի քննարկման ժամանակ, հայտարարել է ֆինանսների փոխնախարար Արման Պողոսյանը։

Փոխնախարարի խոսքով՝ Կառավարության ծրագիրը նախատեսում է հարկային քաղաքականության կարևոր ուղղություն։ Այն է՝ կրկնակի հարկումը բացառելու մասին համաձայնագրերի կիրառման աշխարհագրության ընդլայնումը։ Սա հատկապես կարևոր է այն երկրների համար, որոնց հետ սպասվում է տնտեսական կապերի ամրապնդում և ներդրումների ներգրավում։

«Հենց այս համատեքստում էլ 2024 թվականի դեկտեմբերի 26-ին նախաձեռնվել և ստորագրվել է Հայաստանի Հանրապետության և Ճապոնիայի Պետության միջև «Եկամտի կրկնակի հարկումը կանխելու մասին» կոնվենցիան», - ասել է Պողոսյանը։

Նրա խոսքով, նման համաձայնագրերը լուծում են երկու հիմնական խնդիր՝ դրանք սահմանում են ավելի բարենպաստ հարկային պայմաններ (համեմատած ազգային օրենսդրությամբ նախատեսվածների հետ) և ապահովում են կայուն, կանխատեսելի հարկային միջավայր երկու երկրների ձեռնարկատերերի համար։

«Մինչ օրս գործում էր դեռևս Ճապոնիայի և Խորհրդային Միության միջև ստորագրված համաձայնագիրը, որը, սակայն, Հայաստանի Հանրապետության կողմից իրավական պատճառներով չէր կիրառվում։ Նոր նախաձեռնությունը թույլ կտա վերականգնել նման փաստաթղթերի կիրառման պրակտիկան»,- պարզաբանել է կառավարության ներկայացուցիչը։

Հայաստանի Հանրապետության արտաքին գործերի նախարարության եզրակացության համաձայն՝ տվյալ կոնվենցիան կնպաստի Հայաստանի Հանրապետության և Ճապոնիայի միջև տնտեսական կապերի, ինչպես նաև առևտրի և ներդրումների զարգացմանը։ Փաստաթղթի վավերացումը նաև կլրացնի 2018 թվականին ստորագրված՝ ներդրումների խրախուսման և փոխադարձ պաշտպանության մասին համաձայնագիրը։