Սեբաստիան Լեկոռնյուն ստանձնել է Ֆրանսիայի վարչապետի պաշտոնը

Սեբաստիեն Լեկոռնյուն, ում նախագահ Էմանուել Մակրոնը նշանակել է Ֆրանսիայի հինգերորդ վարչապետ երկու տարվա ընթացքում, պաշտոնը ստանձնել է չորեքշաբթի օրը՝ հակակառավարական լայնածավալ բողոքի ակցիաների օրը, որոնք ընդգծել են երկրում քաղաքական ճգնաժամի խորությունը, գրում է Reuters-ը։

Լեկոռնյուն, որը մինչ այդ պաշտպանության նախարարի պաշտոնն էր զբաղեցնում, կեսօրին ժամանել է վարչապետի նստավայր, որտեղ հանդիպել է նախկին վարչապետ Ֆրանսուա Բայրուի հետ, որին խորհրդարանը երկուշաբթի օրը հեռացրել էր պաշտոնից՝ երկրի հսկայական բյուջեի դեֆիցիտը կրճատելու ծրագրերի պատճառով։

Նոր վարչապետը պետք է 2026 թվականի բյուջեի ամբողջական նախագիծը խորհրդարան ներկայացնի մինչև հոկտեմբերի 7-ը, թեև մինչև հոկտեմբերի 13-ը որոշակի մանևրելու տեղ կա, որից հետո օրենսդիրները ժամանակ չեն ունենա տարեվերջին բյուջեն ընդունելու համար։

Լեկոռնյուի նշանակման վերաբերյալ երեքշաբթի օրվա արձագանքը ընդգծել է այն բարդ խնդիրը, որին նա բախվում է։ Կուսակցությունները հիմնականում համաձայն են Ֆրանսիայի բյուջեի դեֆիցիտը կրճատելու անհրաժեշտության հետ, որը 2024 թվականին հասել է ՀՆԱ-ի 5,8%-ին, բայց ոչ այն բանի, թե ինչպես դա անել։ Մինչ ծայրահեղ ձախերը հայտարարում էին, որ կփորձեն տապալել Լեկոռնյուին անվստահության անհապաղ քվեով, ծայրահեղ աջ Ազգային ճակատը նախնական պատրաստակամություն է հայտնել բյուջեի շուրջ նրա հետ աշխատելու վերաբերյալ, պայմանով, որ նրա բյուջետային պահանջները կբավարարվեն։

Իշխանությունները 80 000 ոստիկանների են մոբիլիզացրել ամբողջ երկրում՝ ցուցարարներին զսպելու համար, որոնք խոչընդոտում էին երթևեկությունը, այրում աղբամանները և ժամանակ առ ժամանակ բախվում անվտանգության ուժերի հետ։