Ադրբեջանական լրատվամիջոցները հաղորդել են, որ Գերմանիայի բանկային չհրկիզվող պահարանից գողացել են Ադրբեջանի գիտությունների ազգային ակադեմիայի նախագահ Իսա Հաբիբբեյլիի դստերը՝ Գյունայ Մասիմովային պատկանող ավելի քան 1 միլիոն դոլարի արտարժույթ և արժեքավոր իրեր։

Մասիմովային պատկանող պահարանում, ըստ տեղեկությունների, եղել է 790 հազար դոլար (եվրոյին համարժեք) և ադամանդներ, ինչպես նաև 330 հազար եվրո կանխիկ գումար։ Գումարը և արժեքավոր իրերը, ենթադրաբար, գողացել է Մասիմովայի Գերմանիայում ապրող ծանոթը՝ ոմն Ֆ.Մ.։

Նրան հաջողվել է փախչել գումարով, սակայն ոստիկանությունը գտել է զարդերի մի մասը և առգրավել այն մինչև հետագա հետաքննությունը։ Գողացված ճշգրիտ գումարը դեռևս պաշտոնապես չի հաստատվել։

Նյուրնբերգում հետաքննություն է սկսվել գումարի և արժեքավոր իրերի ծագումը պարզելու համար, սակայն այն չի հաջողվել ավարտել, քանի որ Մասիմովան անմիջապես լքել է Գերմանիան։ Պարզվել է նաև, որ նա Գերմանիայում բնակության իրավունք է ստացել կեղծ ամուսնության միջոցով։ Այնուհետև նա ձեռք է բերել մոտ 1 միլիոն եվրո արժողությամբ անշարժ գույք՝ առանձնատուն և բնակարան Բեռլինի Kohulfurter փողոցում։

Ըստ հաղորդագրությունների՝ Մասիմովան իր փողն ու արժեքավոր իրերը Բաքվից Գերմանիա է բերել անցյալ տարվա հունիսին և որոշել է դրանք Նյուրնբերգում բնակվող իր ծանոթ Ֆ.Մ.-ի միջոցով պահել Sparkasse բանկի չհրկիզվող պահարանում։ Թեև նման տեսակի անվտանգ պահարանները Գերմանիայում նախատեսված են մինչև 10 հազար եվրո արժողությամբ փաստաթղթեր և արժեքավոր իրեր պահելու համար, բանկին թույլատրված չէ դրանք բացել կամ ստուգել դրանց պարունակությունը։

Մասիմովայի հետ հանդիպելուց առաջ Ֆ.Մ.-ն Fürth բանկի մասնաճյուղում բացել է անվտանգ պահարան իր ընկերներից մեկի անունով, ապա՝ մեկ այլ՝ Մասիմովայի անունով, բայց մուտքի քարտը պահել է իրեն։ Երբ նրանք հասել են բանկ, դյուրահավատ Մասիմովան չի նկատել, որ իր փողն ու զարդերը դրված են եղել ուրիշի անվտանգ պահարանում։

Հունվարին, երբ նա գնացել է բանկ՝ իր ոսկե և ադամանդե ժամացույցներից մեկը վերցնելու, հայտնաբերել է, որ չհրկիզվող պահարանը դատարկ է։ Պարզվել է, որ Ֆ.Մ.-ն... հանել էր պարունակությունը և փախել Բալթյան երկրներից մեկը։ Իմանալով միջոցների ծագման վերաբերյալ հետաքննության մասին՝ Մասիմովան շտապ վերադարձել է Բաքու։

Սակայն ընկերոջ հայրը, որի անունով Ֆ.Մ.-ն գաղտնի բացել էր հաշիվը՝ Գերմանիայի բնակիչ Ալեսկեր Վելիևը, այդ ամենի մասին հայտնել է ոստիկանությանը։ Իրավապահ մարմիններին հաջողվել է վերականգնել զարդերի մի մասը, բայց գումարի ճակատագիրը մնում է անհայտ։ Պատմությունն այսքանով չի ավարտվել։

Մասիմովան ևս ոստիկանություն է դիմել։ Հունիսին Ալեսկեր Վելիևի կինը՝ Ամալիա Վելիևան, որը Բաքու էր ժամանել արձակուրդի, ձերբակալվել է օդանավակայանում և տարվել կազմակերպված հանցագործության դեմ պայքարի գլխավոր վարչություն։ Դրանից հետո, ինչպես նա պնդում է, իրենից պահանջվել է Հեյդար Ալիևի պողոտայում գտնվող ընտանիքի 500 հազար մանաթ արժողությամբ տունը փոխանցել Գյունայ Մասիմովային։ Հետագայում նրան արգելվել է լքել Ադրբեջանը։ Ի վերջո, նա համաձայնել է տունը հանձնել։

Գյունայ Մասիմովան նախկինում զբաղեցնում էր Խիրդալան քաղաքի 2-րդ նոտարական բաժնի ղեկավարի պաշտոնը։

Ադրբեջանի Գիտությունների ազգային ակադեմիայի ղեկավար Իսա Հաբիբեյլին ադրբեջանական լրատվամիջոցներին հայտնել է, որ դա իրականությանը չի համապատասխանում։

«Նրանից գողացել են մեծ քանակությամբ զարդեր և անձնական իրեր. դրանք զարդեր են, որոնք նա ժառանգել է մորից և սկեսուրից։ Գրված ամեն ինչ խիստ չափազանցված է։ Ես ոչինչ չգիտեմ մեկ միլիոն եվրոյի գողության մասին։ Խնդրում եմ նման հարցերի առնչությամբ իմ անունը չհիշատակել»,- ասել է Հաբիբեյլին։