Տեխաս նահանգի բանտում մահապատժի ի կատար ածումը տևել է ավելի քան մեկ ժամ՝ ներարկման հետ կապված դժվարությունների պատճառով։ Այս մասին հայտնել է Associated Press (AP) գործակալությունը։

70-ամյա Ռեյնալդո Դենեսը մեղավոր էր ճանաչվել 1996 թվականին Հյուսթոնում թանկարժեք քարերի վաճառականի սպանության համար։ Նրան մահացու ներարկում են արել, սակայն ընթացակարգը տևել է ավելի քան մեկ ժամ, քանի որ բանտի աշխատակիցները չէին կարողանում երակ գտնել։ Երբ դեղամիջոցը ներարկվել է, դատապարտյալը տնքացել է, մի քանի անգամ բողոքել ոտքի ցավերից և ջղաձգումներից։

Բանտի ներկայացուցիչները գործակալությանը հայտնել են, որ մահապատիժն իրականացվել է սահմանված ընթացակարգերին համապատասխան։

Սեպտեմբերի վերջին Նեշվիլի (Թենեսի նահանգ) բանտում ամերիկուհի Քրիստա Փայքին մահացու ներարկման համար նախատեսված դեղամիջոցի երկու դեղաչափ են ներարկել, սակայն դատապարտյալը ողջ է մնացել։ Ավելի վաղ փաստաբանները նախազգուշացրել էին, որ կինը տառապում է թրոմբոցիտոզով, որի դեպքում դեղամիջոցի ներարկումը կարող է հանգեցնել թրոմբների առաջացման և լրացուցիչ տառապանքների։