Ամերիկյան նավթային ընկերությունները երկար տարիներ հույս ունեին վերադարձնել այն ակտիվները, որոնք Վենեսուելայի ավտորիտար ռեժիմը մի քանի տասնամյակ առաջ վերցրել էր նրանցից։ Այժմ ԱՄՆ նախագահ Դոնալդ Թրամփի վարչակազմը նրանց առաջարկում է աջակցություն այդ նպատակի իրականացման հարցում՝ սակայն մեկ կարևոր պայմանով, գրում է Politico-ն։

Երկու աղբյուրի տեղեկություններով, որոնք ծանոթ են ԱՄՆ վարչակազմի վերջին շփումներին նավթային ոլորտի ներկայացուցիչների հետ, պաշտոնյաները հայտնել են ընկերությունների ղեկավարությանը, որ եթե նրանք փոխհատուցում են ակնկալում կորցրած հորատանցքերի, խողովակաշարերի և առգրավված այլ գույքի համար, ապա պետք է արդեն հիմա վերադառնան Վենեսուելա և զգալի ներդրումներ կատարեն երկրի քայքայված նավթարդյունաբերության վերականգնման գործում։

Վենեսուելայի նավթային ենթակառուցվածքի ճակատագիրը դարձել է առանցքային հարցերից մեկը ԱՄՆ ռազմական գործողությունից հետո, որի արդյունքում ձերբակալվել էր երկրի առաջնորդ Նիկոլաս Մադուրոն։

Միևնույն ժամանակ ոլորտի ներկայացուցիչները նշում են, որ վարչակազմի նման ազդակները միայն ուժեղացրել են իրենց զգուշավորությունը։ Նավթահանքերի վերականգնումը երկրում, որտեղ դեռևս պարզ չէ, թե ով է կառավարելու պետությունը մոտ ապագայում, չափազանց բարդ խնդիր է։ Ինչպես նշել է բանակցություններին ծանոթ աղբյուրներից մեկը, վարչակազմի դիրքորոշումը հնչում է այսպես․ «Եթե ուզում եք մասնակցել և ստանալ փոխհատուցում՝ պետք է ներսում լինեք»։

Ըստ աղբյուրի, այս առաջարկը քննարկվում է արդեն մոտ տասը օր։ Սակայն ենթակառուցվածքի վիճակն այնքան վատ է, որ ոչ մի ընկերություն ի վիճակի չէ պատշաճ գնահատել այն աշխատանքների ծավալը, որոնք անհրաժեշտ են դրա գործարկման համար։ Այնուամենայնիվ, Դոնալդ Թրամփը շաբաթ առավոտյան հեռուստատեսային ուղերձում հստակ հասկացրել է, որ լիովին ակնկալում է ամերիկյան նավթային կորպորացիաների մասշտաբային ներդրումները։

Նա հայտարարել է, որ ԱՄՆ-ի խոշորագույն նավթային ընկերությունները միլիարդավոր դոլարներ կներդնեն լրջորեն վնասված նավթային ենթակառուցվածքի վերականգնման գործում և կսկսեն շահույթ ստանալ՝ միաժամանակ եկամուտ բերելով երկրին։

Արդեն գրեթե հիսուն տարի է անցել Վենեսուելայի նավթարդյունաբերության առաջին ազգայնացումից և մոտ քսան տարի՝ այն պահից, երբ նախկին նախագահ Ուգո Չավեսը ընդլայնեց ակտիվների առգրավման պրակտիկան։ Չնայած աշխարհում ամենամեծ նավթային պաշարներից մեկին, երկրի նավթային ենթակառուցվածքը տարիների անարդյունավետ կառավարման և ներդրումների քրոնիկ պակասի հետևանքով հայտնվել է անկման մեջ։

Մադուրոյից հետո Վենեսուելայի ապագայի շուրջ առաջին քննարկումներն ամերիկյան նավթային ոլորտի ներկայացուցիչների և շուկայական վերլուծաբանների շրջանում ավելի շատ հարցեր են առաջացնում, քան պատասխաններ։ Ինչպես նշել է նախկինում նախագահ Ջորջ Բուշ-կրտսերի ազգային անվտանգության և էներգետիկ հարցերով խորհրդական Բոբ Մաքնելին, վարչակազմը դեռևս չի ներկայացրել հստակ երկարաժամկետ ծրագիր։ Անհասկանալի է, թե ինչպիսին կլինի նոր ռեժիմը, ինչ մեխանիզմներով կիրականացվի անցումը և ինչպիսի երաշխիքներ կստանան ընկերությունները։

Ոլորտի հիմնական մտահոգություններից են՝ աշխատակիցների և սարքավորումների անվտանգությունը, ներդրումների փոխհատուցման սխեման, նավթի համաշխարհային գների մակարդակը և Վենեսուելայի ապագա անդամակցությունը ՕՊԵԿ-ին։ Ուրբաթ օրվա առևտրի փակման պահին ամերիկյան նավթի էտալոնային գինը կազմում էր մեկ բարելի համար 57 դոլար՝ նվազագույն մակարդակը համավարակի ավարտից ի վեր։

Սպիտակ տունը չի տվել արագ պատասխան նավթային ոլորտի ռազմավարության վերաբերյալ հարցումներին, սակայն Թրամփը կրկին ընդգծել է, որ նախնական ներդրումները պետք է ապահովեն հենց ընկերությունները։ Նա հայտարարել է, որ ենթակառուցվածքը կվերականգնվի միլիարդավոր դոլարների հաշվին, որոնք ուղղակիորեն կներդնեն նավթային կորպորացիաները, որոնք հետագայում կստանան փոխհատուցում և կապահովեն արդյունահանման վերսկսումը։

Միևնույն ժամանակ ոլորտի մասնակիցները շեշտում են, որ վարչակազմի հետ շփումները գտնվում են ամենավաղ փուլում և մասնակի բնույթ են կրում։ Քննարկումները վերաբերում են նաև պետական նավթային ընկերության՝ PDVSA-ի ապագային, որը, ըստ աղբյուրների, չի սեփականացվի կամ վաճառվի, այլ ամենայն հավանականությամբ ենթարկվելու է ղեկավարության լիակատար փոփոխության։ Միակ խոշոր ամերիկյան ընկերությունը, որը շարունակում է աշխատել Վենեսուելայում հատուկ լիցենզիայի հիման վրա, մնում է Chevron-ը, որը հայտարարում է, որ գործում է օրենքներին խիստ համապատասխան և առաջնահերթ ուշադրություն է դարձնում աշխատակիցների անվտանգությանը և ակտիվների պահպանությանը։