Արդեն շուրջ 15 տարի բրիտանական Լարի կատուն հմայում է Դաունինգ սթրիթ 10-ի այցելուներին։ Այժմ Բելգիայի վարչապետի ևս մեկ ընտանի կենդանի դարձել է սոցիալական ցանցերի հիթ, գրում է The Guardian-ը։

Օգոստոսին հայտարարվել էր, որ Մաքսիմուս Տեքստորիս Պուլխերը պաշտոնապես աշխատում է Բելգիայի վարչապետի գրասենյակում՝ Բրյուսելի կենտրոնում գտնվող Rue de la Loi 16 հասցեում։

Այժմ համարվում է, որ մոխրագույն կատուն Բելգիայի սոցիալական ցանցերում հանրահայտությամբ երկրորդ քաղաքական էջն ունի՝ Instagram-ում ավելի քան 142 000 հետևորդով։ Նա զիջում է միայն իր տիրոջը՝ Բարտ դե Վևերին, որը փետրվարին դարձել է Բելգիայի վարչապետ։

Կատվի լրիվ անունը կատակային-վերամբարձ տիտղոս է՝ հիմնված լատիներենի և Հռոմի պատմության հանդեպ վարչապետի սիրո վրա, և նշանակում է «Դե Վևերի գեղեցիկ Մաքսիմուսը» (տեքստորիս նշանակում է «ջուլհակ» կամ Դե Վևեր)։ Դե Վևերը շոտլանդական կախականջ (սքոթիշ ֆոլդ) ցեղատեսակի լքված կատվին վերցրել է կացարանից։

«Գրասենյակումս մի կատու է ապրում, նա մոխրագույն է և մուկ․․․  չի բռնում, բայց ես միևնույն է սիրում եմ նրան»,- վերջերս կայացած մամուլի ասուլիսի ժամանակ լրագրողներին ասել է նա։

Մաքսիմուսի գրառումները Instagram-ում «ալեկոծում են» բելգիական համացանցը՝ անկախ նրանից՝ նա ձգվում է խաղալիքի հետևից, պառկած է պատուհանագոգին, թե նրան խտղտում են էլեկտրափոփ ոճի երաժշտության ներքո։