Նախընտրելի
Սպիտակ տան պաշտոնյաներն ավելի հավանական արդյունք են համարում կղզին ձեռք բերելու կամ դրա հետ նոր դաշինք կազմելու ԱՄՆ-ի փորձը։ Չի բացառվում, որ ԱՄՆ-ը ստիպված կլինի մինչև 700 միլիարդ դոլար վճարել, եթե ցանկանում է հասնել Գրենլանդիան ձեռք բերելու նախագահ Դոնալդ Թրամփի նպատակին, գրում է NBC News-ը՝ հղում անելով իր աղբյուրներին։
Ըստ աղբյուրների՝ գնահատականը կազմել են գիտնականներն ու ամերիկացի նախկին պաշտոնյաները՝ 800 հազար քառակուսի մղոն տարածքով կղզին Արկտիկայում՝ Ամերիկայի հիմնական հակառակորդների դեմ ռազմավարական բուֆեր ձեռք բերելու Թրամփի ջանքերի ծրագրման շրջանակում։
Դա Պաշտպանության նախարարության տարեկան բյուջեի կեսից ավելին դնում է Թրամփի ազգային անվտանգության առաջնահերթության վրա, ինչը մտահոգություն է առաջացրել ամբողջ Եվրոպայում և Կապիտոլիումում՝ Գրենլանդիան գրավելու մասին նրա հռետորաբանության ֆոնին, այն պահից ի վեր, երբ նա հրամայել էր ԱՄՆ ռազմական հարձակում՝ Վենեսուելայի նախագահին և նրա կնոջը գերի վերցնելու համար, հաղորդում է հեռուստաալիքը։
Գրենլանդիան, որը Դանիայի թագավորության ինքնավար տարածք է, չի վաճառվում։ Դանիացի և գրենլանդացի պաշտոնյաները մերժել են Թրամփի պնդումները, ըստ որի Միացյալ Նահանգները «այս կամ այն կերպ» ձեռք կբերի Գրենլանդիան։ Սակայն, Սպիտակ տան բարձրաստիճան պաշտոնյան հայտարարել է, որ պետքարտուղար Մարկո Ռուբիոյին հանձնարարվել է առաջիկա շաբաթներին առաջարկել Գրենլանդիան գնել՝ նման ծրագիրը որակելով որպես Թրամփի համար «բարձր առաջնահերթություն»։
Ռուբիոն և փոխնախագահ Ջեյմս Դեյվիդ Վենսը չորեքշաբթի նախատեսում են Վաշինգտոնում հանդիպել դանիացի և գրենլանդացի պաշտոնյաների հետ՝ Թրամփի մտադրություններն ու առաջարկները ավելի լավ ըմբռնելու նպատակով։
Հանդիպումը հաջորդում է դանիացի և գրենլանդացի պաշտոնյաների և Սպիտակ տան Ազգային անվտանգության խորհրդի միջև անցյալ շաբաթ շարքային մակարդակի քննարկումներին։
Մինչ Թրամփի վարչակազմի որոշ պաշտոնյաներ հայտարարել են, որ ԱՄՆ-ը կարող է ռազմական ուժ կիրառել 57 հազար բնակչություն ունեցող կղզին գրավելու համար, որոշ վարչակազմի պաշտոնյաներ և Սպիտակ տնից դուրս դաշնակիցներ Միացյալ Նահանգների փորձը կղզին ձեռք բերելու կամ դրա հետ նոր դաշինք կազմելու համար համարում են ավելի հավանական արդյունք։ Քննարկվող մեկ այլ տարբերակ է Գրենլանդիայի հետ այսպես կոչված ազատ ասոցացման համաձայնագրի կնքումը, որը կներառի ԱՄՆ ֆինանսական օգնություն՝ ԱՄՆ-ի կողմից այնտեղ անվտանգություն ապահովելու թույլտվության դիմաց, հաղորդում է NBC News-ը։
Միացյալ Նահանգները նմանատիպ համաձայնագրեր ունի Մարշալյան կղզիների Հանրապետության, Միկրոնեզիայի Դաշնային Նահանգների և Պալաուի Հանրապետության հետ: Գրենլանդիան այդ ցանկին ավելացնելը կարող է մասամբ բավարարել Թրամփի՝ Արևմտյան կիսագնդում ամերիկյան գերիշխանության ավելի լայն տեսլականը և ավելի էժան կլինի, քան Գրենլանդիայի համար գնահատված 500-700 միլիարդ ԱՄՆ դոլարի գինը, հայտնում է լրատվամիջոցը:
