Նախընտրելի
Կոլումբիայի նախագահ Գուստավո Պետրոն փետրվարի 3-ին կայցելի Միացյալ Նահանգներ, որտեղ կհանդիպի ամերիկացի առաջնորդ Դոնալդ Թրամփի հետ՝ երկկողմ հարաբերությունները քննարկելու համար, հաղորդում են արևմտյան լրատվամիջոցները։
Պետրոն իր ծրագրերի մասին հայտարարել է նախարարների կաբինետի նիստի ժամանակ։ Նրա խոսքով՝ հանդիպումը հնարավոր է դարձել նախորդ շաբաթ երկու առաջնորդների միջև տեղի ունեցած հեռախոսազրույցի շնորհիվ։
Կոլումբիայի նախագահը նշել է, որ Թրամփի հետ կքննարկի երկու երկրների հարաբերություններում առկա լարվածությունը, մասնավորապես՝ թմրամիջոցների ապօրինի շրջանառության հետ կապված հարցերը։
Պետրոն նախկինում հայտարարել էր, որ Թրամփը նրան հրավիրել է Սպիտակ տանը կայանալիք հանդիպմանը, սակայն այդ ժամանակ ամսաթիվ չէր նշվել։ Թրամփը հայտարարել էր, որ փետրվարի առաջին շաբաթում կհյուրընկալի Կոլումբիայի նախագահին։
Թրամփի և Պետրոյի հարաբերությունները վերջին ամիսներին լարված են եղել։ Կոլումբիացի առաջնորդը հաճախ հանդես է եկել ամերիկացի գործընկերոջ գործողությունների քննադատությամբ։ Թրամփն իր հերթին մեղադրել է Պետրոյին՝ Կոլումբիայից ԱՄՆ թմրամիջոցների մատակարարմանը դե ֆակտո մասնակցության մեջ։
Կարակասում Վենեսուելայի նախագահ Նիկոլաս Մադուրոյի ձերբակալման վերջերս իրականացված գործողությունից հետո Թրամփը նախազգուշացրել է, որ Կոլումբիայի նախագահն այժմ նույնպես պետք է զգուշություն ցուցաբերի։
