նախընտրելի դարձնել
Հայաստանում թվային խաղային ոլորտի կարգավորումը պետք է իրականացնի հատուկ օպերատոր։ Այս մասին փետրվարի 4-ին խորհրդարանի տնտեսական հարցերի մշտական հանձնաժողովի նիստում՝ «Խաղային գործունեության կարգավորման մասին» օրենքում լրացումներ կատարելու և հարակից օրենքներում փոփոխություններ անելու օրինագծերի փաթեթի քննարկման ժամանակ, հայտարարել է Պետական եկամուտների կոմիտեի (ՊԵԿ) նախագահի տեղակալ Ռաֆայել Գևորգյանը։
Պաշտոնյայի խոսքով՝ ՊԵԿ-ը ձևավորել է միջգերատեսչական հանձնաժողով, որն անցկացնում է խաղային գործունեության ոլորտի օպերատորի ընտրության մրցույթ։
«Ենթադրվում է, որ օպերատորը կներգրավվի մինչև 15 տարի ժամկետով և կապահովի խաղային համակարգի թվային կարգավորումը», - հայտնել է Գևորգյանը։
Ըստ նախագծի՝ Հայաստանում, մասնավորապես, կստեղծվի թվային ենթակառուցվածք, որը կինտեգրվի խաղային գործունեության բոլոր օպերատորներին և կազմակերպիչներին։ Դրանց թվում են ինչպես օնլայն հարթակները, այնպես էլ դասական խաղային հաստատությունները։
Համակարգի ներդրման հաշվին Հայաստանի կառավարությունը նախատեսում է ստանալ կենտրոնացված տեղեկատվություն ոլորտի բոլոր գործառնությունների վերաբերյալ, ներառյալ խաղադրույքները, շահումներն ու կորուստները։
«Ներկայումս ՊԵԿ-ը չունի անհրաժեշտ տվյալների ամբողջական զանգվածը, իսկ թվային գործիքների ներդրման մակարդակը շարունակում է մնալ անբավարար։ Այս ամենն էլ հիմք է հանդիսացել տվյալ գործընթացի մեկնարկի համար», - ընդգծել է գերատեսչության փոխնախագահը։
Որոշ քննարկումներից հետո օրենսդրական նախաձեռնությունը ստացել է խորհրդարանի մշտական հանձնաժողովի դրական եզրակացությունը։
