Նախընտրելի
ԱՄՆ նախագահ Դոնալդ Թրամփը հինգշաբթի The New York Post-ի հետ հեռախոսազրույցում քննադատել է «անօգտակար» դաշնակիցներին՝ Իսպանիային անվանելով «անհաջողակ» և հայտարարելով, որ Մեծ Բրիտանիայի վարչապետ Քիր Սթարմերը պետք է «անվերապահորեն» աջակցի Իրանի դեմ ԱՄՆ արշավին։
«Մենք շատ հաղթողներ ունենք, բայց Իսպանիան անհաջողակ է («loser»), իսկ Մեծ Բրիտանիան շատ հիասթափեցրեց։ (Իսպանիան) շատ թշնամաբար է տրամադրված ՆԱՏՕ-ի նկատմամբ։ Նրանք չեն վճարում իրենց հասանելիքը. նրանք միակն են, ովքեր քվեարկել են 5% վճարման դեմ, և շատ թշնամաբար են տրամադրված բոլորի նկատմամբ», - հայտարարել է Թրամփը՝ անդրադառնալով պաշտպանության վրա ՀՆԱ-ի 5%-ը ծախսելու դաշինքի անդամ երկրի պարտավորությանը։ «Իսպանիան թիմային խաղացող չէ, և մենք մտադիր չենք Իսպանիայի հետ թիմային խաղացող լինել»,- հայտարարել է ԱՄՆ նախագահը։
The Telegraph-ի հոդվածի մասին հարցին, որտեղ նա անձամբ Մեծ Բրիտանիայի վարչապետ Քիր Սթարմերին ևս «անհաջողակ» է անվանել, Թրամփն անկեղծորեն պատասխանել է.«Դե, նա Ուինսթոն Չերչիլը չէ, թույլ տվեք այդպես արտահայտվել»:
ԱՄՆ նախագահն ասել է, որ հիասթափված է Սթարմերից՝ Իրանի դեմ ամերիկյան և իսրայելական ռմբակոծությունների ժամանակ Միացյալ Նահանգներին բրիտանական ռազմական բազաներն օգտագործելն արգելելու համար։
«Դա շատ հիասթափեցնող էր՝ նրա գործունեությունը կապված թշնամական երկրի վրա մեր զանգվածային հարձակման հետ,- ասել է Թրամփը։ -Նա պետք է մեզ տրամադրեր, առանց որևէ հարցի կամ տատանման, այնպիսի բաներ, ինչպիսիք բազաներն են, որտեղ մենք կարող էինք օգտագործել ուրիշներին»։
ԱՄՆ նախագահը հավելել է, որ իրեն զարմացրել է Սթարմերի՝ Պենտագոնի հետ համագործակցելու դժկամությունը՝ հաշվի առնելով Մեծ Բրիտանիայի և ԱՄՆ-ի միջև սերտ դաշինքը։
«Մենք, անշուշտ, պետք է կարողանանք ապավինել նրանց։ Ես շատ զարմացած էի Քիրից։ Շատ հիասթափված»,- հավելել է նա։
