Ապրիլի սկզբին արևմտյան խոշոր նավահանգիստներից ռուսական նավթի արտահանումը մարտ ամսվա համեմատ աճել է, հակառակ ուկրաինական անօդաչու թռչող սարքերի հարձակումների հետևանքով առաջացած բեռնման խափանումներին, գրում է Reuters-ը՝ հղում անելով իր սեփական աղբյուրներին և հաշվարկներին:

Մարտի վերջին Ուկրաինան ակտիվացրել է անօդաչու թռչող սարքերի հարձակումները Բալթյան և Սև ծովերի ռուսական նավթի արտահանման նավահանգիստների, ինչպես նաև ռուսական խոշոր նավթավերամշակման գործարանների վրա, ինչը արտահանման և վերամշակման մատակարարման շղթաների խափանումների պատճառով մեծացնում է ռուսական նավթի արդոյւնահանման կրճատման վտանգը, հաղորդում է BBC-ն։

Ըստ Reuters աղբյուրների՝ Բալթյան Ուստ-Լուգա և Պրիմորսկ նավահանգիստները, ինչպես նաև Սև ծովի Նովոռոսիյսկ նավահանգիստը, ապրիլի առաջին շաբաթում ընդհանուր առմամբ օրական մոտ 2 միլիոն բարել նավթ են բեռնել՝ մարտ ամսվա միջին օրական 1,9 միլիոն բարելի համեմատ։

Ըստ գործակալության աղբյուրների՝ բեռնման ամենամեծ մասը տեղի է ունեցել Պրիմորսկում, որը մարտի 23-ին ենթարկվել է անօդաչու թռչող սարքերի հարձակման, սակայն բեռնումը շուտով վերսկսվել է։

Ուստ-Լուգայում նավթի բեռնումը դադարեցվել էր մարտի 25-ին՝ անօդաչու թռչող սարքի հարձակման հետևանքով, և վերսկսվել էր միայն ապրիլի 6-ին, որի արդյունքում ամսվա սկզբին նավահանգստից նվազագույն բեռնափոխադրումներ են եղել։

Հինգշաբթի երեկոյան Նովոռոսիյսկի նավահանգստի Շեշխարիս տերմինալից նավթի և վառելիքի բեռնումը անօդաչու թռչող սարքի հարձակման պատճառով չորսօրյա դադարեցումից հետո մասամբ վերսկսվել էր։ Մարտի սկզբին «Շեշխարիս» տերմինալի վրա կատարված նախորդ խոշոր հարձակման հետևանքով հում նավթի բեռնման և արտահանման ուշացումները հինգ օրով դադարեցվել էին։