Հայաստանյան բուհերի շրջանավարտները աշխատանքի տեղավորման հարցում բախվում են դժվարությունների, քանի որ կրթական համակարգը չի համապատասխանում շուկայի պահանջներին։ Այս մասին Facebook-յան իր էջի տեսաուղերձում հայտարարել է «Ուժեղ Հայաստան» կուսակցության նախընտրական ցուցակը գլխավորող Նարեկ Կարապետյանը։

Նրա խոսքով՝ ի տարբերություն մի շարք արտասահմանյան երկրների, որտեղ ուսանողները աշխատանքի առաջարկներ են ստանում ուսումնառությունն ավարտելուն պես, Հայաստանում երիտասարդ մասնագետները ստիպված են ինքնուրույն փնտրել աշխատանք։ Խնդրի պատճառը նա տեսնում է տնտեսության և կրթական համակարգի միջև առկա համակարգման բացակայության մեջ։

Որպես օրինակ նա մատնանշել է Գերմանիան, որտեղ պետությունը ձևավորում է տարբեր ոլորտների մասնագետների պատրաստման կոնկրետ քանակի հայտ, ինչը թույլ է տալիս ապահովել շրջանավարտների զբաղվածությունը։

Կարապետյանը նաև նշել է, որ իր համակուրսեցիների շրջանում գրեթե չկան մարդիկ, ովքեր աշխատում են իրենց մասնագիտությամբ՝ չնայած տարիների ուսումնառությանը և ֆինանսական ներդրումներին։

Նրա կարծիքով՝ պետությունը պետք է սահմանի կադրերի պատրաստման առաջնահերթ ուղղությունները և երաշխավորի շրջանավարտների աշխատանքի տեղավորման հնարավորությունը, ինչը կբարձրացնի կրթության հանդեպ վստահությունը և կբարելավի աշխատաշուկայում տիրող իրավիճակը։