ԱՄՆ, Դանիայի եւ Գրենլանդիայի բանակցությունները կղզու կարգավիճակի վերաբերյալ ընթանում են դրական հետագծով, տեղեկացրել է Սպիտակ տան ներկայացուցիչը, որի խոսքերը մեջբերել է Fox News-ը։

Նրա խոսքով՝ կողմերը մտադիր չեն մանրամասները քննարկել լրատվամիջոցներով, սակայն լավատեսորեն են տրամադրված եւ շարունակում են տեխնիկական խորհրդակցությունները՝ ուղղված տարածաշրջանում ԱՄՆ շահերի ապահովմանը։

Ինչպես նշել է հեռուստաալիքը, քննարկման թեման Գրենլանդիայի ռազմավարական նշանակությունն է, որը գտնվում է Հյուսիսային Ամերիկայի եւ Եվրոպայի միջեւ ամենակարճ ճանապարհին եւ կարեւոր դեր է խաղում Արկտիկայի վաղ նախազգուշացման եւ պաշտպանության համակարգերում։

Ըստ տեղեկությունների՝ բանակցություններն ընթանում են հունվարի վերջից, եւ Վաշինգտոնը հայտարարել է մի շարք հարցերի վերաբերյալ նախնական համաձայնությունների մասին։ ԱՄՆ նախագահ Դոնալդ Թրամփը ավելի վաղ բազմիցս բարձրացրել է Գրենլանդիայի Միացյալ Նահանգների մաս կազմելու հնարավորության հարցը, այդ թվում՝ այն գնելու գաղափարը։

Գրենլանդիան մնում է ինքնավար տարածք Դանիայի կազմում, չնայած Վաշինգտոնը եւ Կոպենհագենն ունեն ՆԱՏՕ շրջանակում պաշտպանական համաձայնագիր նրա պաշտպանության վերաբերյալ։