ԱՄՆ նախագահ Դոնալդ Թրամփն այս շաբաթ կմասնակցի Աստվածաշնչի հրապարակային ընթերցմանը, քանի որ վարչակազմը շարունակում է կրոնը, հատկապես քրիստոնեությունը, ներառել իր պաշտոնական գործունեության մեջ, հայտնում է CNN-ը։

«Ապրիլի 21-ին՝ արևելյան ժամանակով ժամը 18:00-ին, նախագահ Թրամփը ծրագրում է Սուրբ Գիրքն ընթերցել Օվալաձև աշխատասենյակից հեռարձակվող տեսաուղերձի միջոցով»,- նշված է կազմակերպիչների հաղորդագրության մեջ։ Միջոցառումը կրում է «Ամերիկան Աստվածաշունչ է կարդում» խորագիրը։

Թրամփի մասնակցությունը շաբաթ տևող ընթերցումներին հատկապես ուշագրավ է՝ հաշվի առնելով Իրանի հակամարտության պատճառով Հռոմի Լևոն XIV պապի հետ նրա վերջին հակասությունները և շաբաթվա սկզբին առաջացած բացասական արձագանքը։ Վերջինս կապված էր արհեստական բանականությամբ ստեղծված մի լուսանկարի հետ, որտեղ նախագահը պատկերված էր Հիսուսի կերպարով (Թրամփն ավելի ուշ հեռացրել էր այդ հրապարակումը)։

Ըստ կազմակերպիչների, տեսաուղերձում Թրամփը կընթերցի Մնացորդաց երկրորդ գրքի 7:11-22 հատվածը, որը ներառում է հաճախ մեջբերվող խոսք14-ը. «...և եթե Իմ ժողովուրդը, որի վրա դրված է Իմ անունը, խոնարհվի, աղոթի, փնտրի Իմ դեմքը և հետ դառնա իր չար ճանապարհներից, այնժամ Ես կլսեմ երկնքից, կներեմ նրանց մեղքերը և կբժշկեմ նրանց երկիրը»։

Այս խոսքը հանրության ուշադրությանն էր արժանացել նաև այն ժամանակ, երբ «Կովբոյները հանուն Թրամփի» շարժման հիմնադիր Քոուի Գրիֆինը 2021 թվականի հունվարի 6-ին ԱՄՆ Կապիտոլիումի անկարգությունների ժամանակ աղոթել էր ամբոխի առջև։

Սակայն Թրամփի կապն այս խոսքի հետ ավելի հին արմատներ ունի, հայտնում է The Christian Post-ը։ 2016 թվականի նրա հաղթանակից քիչ անց ավետարանչական Էն Գրեմ Լոթսը՝ Բիլի Գրեմի դուստրը, ասել էր, որ դա նշան է, որ Աստված պատասխանում է իր ժողովրդի աղոթքներին, ինչպես ասված է Մնացորդաց երկրորդ գրքի 7:14-ում։

Սիրաքյուսի համալսարանի Մաքսվելի դպրոցի պատմության և քաղաքագիտության պրոֆեսոր Մարգարետ Սյուզան Թոմփսոնը CNN-ին հայտնել է, որ շատ ավետարանչական քրիստոնյաներ խոսք 14-ը դիտարկում են որպես «արդարացում՝ Աստծուն կոչ անելու օրհնել իրենց ազգը»։

Անդրադառնալով այն փաստին, որ Թրամփի վարչակազմը վերջերս հանրային գործերում կիրառում է քրիստոնեական բառապաշար՝ Թոմփսոնը նշել է, որ նախկինում ամերիկյան առաջնորդները՝ Ջիմի Քարտերից մինչև Ջորջ Բուշ, իրենց կրոնական համոզմունքները ներառել են մտածելակերպի մեջ, որն էլ սահմանել է ազգի վերաբերյալ նրանց նպատակները, սակայն առանձին հանրային առաջնորդներ իրենց հավատքը մանդատի չեն վերածել։