«Նարեկացի» արվեստի միությունը «Ռոլան Բիկով» Մանկապատանեկան ֆիլմերի 8-րդ միջազգային փառատոնի շրջանակներում այս տարի եւս իր հյուրընկալ հարկի տակ ընդունեց պատանի հանդիսատեսին:
«Նարեկացի» միության մամուլի ծառայությունից հայտնում են, որ կինոյի եւ հեռուստատեսության զարգացման «Ռոլան Բիկով» հայկական հիմնադրամը 2001 թվականից ի վեր նախաձեռնում է մանկապատանեկան ֆիլմերի ամենամյա փառատոն, որի նպատակն է իրականացնել տարաբնույթ մշակութային, սոցիալական եւ կրթական ծրագրեր, խրախուսել հայ երիտասարդ կինոգործիչների ֆիլմերի ճանաչողության բարձրացմանը, ստեղծել կապեր համաշխարհային կինոգործիչների հետ, ինչպես նաեւ նպաստել երեխաների եւ պատանիների անհատականության ձեւավորմանը:
Հերթական անգամ, ամենամյա կինոփառատոնը հոկտեմբերի 20-25-ին բացառիկ հնարավորություն է ընձեռում հայ հանդիսականին դիտելու միջազգային մանկապատանեկան ֆիլմեր՝ պատմական, արկածային, անիմացիոն եւ այլ ժանրերում:
Դեռ ավելին, փառատոնային օրերին նաեւ սպասվում են քննարկումներ, մամուլի ասուլիսներ, վարպետության դասեր, ստեղծագործական հանդիպումներ, ինչպես նաեւ հետաքրքիր անակնկալներ մանուկների ու պատանիների, ինչու չէ, նաեւ նրանց ծնողների համար:
Փառատոնին մասնակից մանկապատանեկան ֆիլմերը ցուցադրվում են «Նարեկացի» արվեստի միությունում, ինչպես նաեւ Մոսկվա կինոթատրոնում, Մոսկվայի տուն մշակութագործարարական կենտրոնում, Գիտության եւ մշակույթի ռուսական կենտրոնում, ինչպես նաեւ Հայ-ռուսական սլավոնական համալսարանում:
Ֆիլմերի տոմսերը անվճար հիմունքներով տրամադրվում են դպրոցահասակ երեխաներին եւ պատանիներին:
