ԵԽԽՎ–ում հունվարի 26-ին քվեարկությամբ ընդունված՝ «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույցը վտանգ չի պարունակում, նրանից կարելի է նաեւ օգուտ քաղել: Այս մասին այսօր՝ հունվարի 29-ին, լրագրողների հետ հանդիպմանն ասաց ՀՀ ԱԺ պատգամավոր, Սոցիալական հարցերի մշտական հանձնաժողովի անդամ Արագած Ախոյանը:
«Մենք կարող ենք միջազգային հանրությանը ցույց տալ, որ Արցախը պատրաստ է բանակցությունների, իսկ Ադրբեջանը՝ ոչ: Ջրի խնդիր է, անվտանգության խնդիր է, կա նաեւ ջուրը տեղ հասցնելու խնդիր: Օրինակ՝ եթե շատ ջուր բաց թողնվի ու մի քանի գյուղ ոչնչանա, ո՞վ է պատասխան տալու: Եթե ջրազրկվել են, թող գան, բանակցեն Լեռնային Ղարաբաղի իշխանությունների հետ: Նրանք պիտի այս պարագայում հաշվի նստեն ԼՂՀ դիրքորոշման փաստի հետ»,- ասաց Արագած Ախոյանը:
Պատգամավորի խոսքով՝ հակահայկական զեկույցները քաղաքական պատվեր էին Ադրբեջանի կողմից. «Սա միայն կաշառքի եւ ստի վրա հիմնված դիվանագիտության արդյունք էր»:
Արագած Ախոյանը բարձր գնահատեց ԵԽԽՎ-ում մեր պատվիրակության կատարած աշխատանքը: «Հայաստանը թրերով տանկերի դեմ էր ելել: Մանավանդ վերջին ամիսներին հսկայածավալ աշխատանք կատարվեց»,- ասաց նա՝ նշելով, որ մեր կողմից պատվիրակության հասցեին հնչեցված քննադատությունները ճիշտ չէին. «Մենք մեր բաժին մեղքն ունենք: Քննադատում ենք մեր պատվիրակներին այստեղից: Բանակցություններ վարողի համար դժվար է, երբ նրա հետեւից խոսում են»,- ասաց պատգամավորը:
Հիշեցնենք, որ ԵԽԽՎ–ն քվեարկությամբ մերժել էր բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» անվանումով զեկույցը, սակայն ընդունել էր բոսնիացի պատգամավոր Միլիցա Մարկովիչի հեղինակած «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույցը։