Ադրբեջանի եւ Հայաստանի ղեկավարները պիտի հասկանան իրենց պատասխանատվությունը Լեռնային Ղարաբաղում հակամարտություն թույլ չտալու գործում: Այդ մասին լրագրողներին հայտնել է ՌԴ Դաշնության Խորհրդի նախագահ Վալենտինա Մատվիենկոն, հայտնում է ՏԱՍՍ-ը:
«Կարծում եմ, որ եւ Հայաստանի, եւ Ադրբեջանի ղեկավարները պիտի հասկանան իրենց պատասխանատվությունը հակամարտության ցանկացած սրում, ռազմական գործողություններ թույլ չտալու գործում», - ասել է նա:
Նրա խոսքով, ներկայումս անհրաժեշտ է անհապաղ դադարեցնել ցանկացած գնդակոծություն, ուժային գործողություն եւ նստել բանակցությունների սեղանի առջեւ: Մատվիենկոն ընդգծել է, որ Ռուսաստանը կշարունակի բոլոր գերատեսչությունների միջոցով իր ջանքերը հակամարտության հետագա աճ թույլ չտալու եւ խաղաղ բանակցությունները վերականգնելու նպատակով:
Մատվիենկոն հիշեցրել է, որ Լեռնային Ղարաբաղում իրավիճակի կարգավորումը միշտ «գտնվել է ռուսաստանյան ղեկավարության ուշադրության կիզակետում». «Եվ մենք, իհարկե, շատ անհանգստացած ենք այս հակամարտության լարվածության սրմամբ»:
Մասնավորապես, սենատորը հիշեցրել է, որ Ռուսաստանի ղեկավարությունը հանդես է եկել երկու կողմից ռազմական գործողությունների անհապաղ դադարեցման օգտին` թույլ չտալու այս հակամարտության հետագա զարգացումը: «Ռուսաստանը այս ամբողջ ընթացքում ԵԱՀԿ Մինսկի խմբի եռակողմ ձեւաչափի շրջանակում հանդես է եկել այն բանի օգտին, որ այս խնդիրը միայն խաղաղ քաղաքական լուծում ունենա: Այստեղ ուժային միջոց գոյություն չունի», - ամփոփել է սենատորը:
