Ադրբեջանն այսօր՝ ապրիլի 6-ին, տանկով կրակել է շտապօգնության մեքենայի ուղղությամբ: Արցախում NEWS.am-ի հատուկ թղթակցի փոխանցմամբ, այս մասին Ստեփանակերտում լրագրողների հետ զրույցում ասել է ԼՂՀ ՊԲ օպերատիվ բաժնի պետ Վիկտոր Առուստամյանը:
«Հյուսիսային ուղղությամբ ադրբեջանական կողմը Շտապօգնության մեքենա է ոչնչացրել, որը գնում էր՝ նախկինում մահացած զինծառայողների դիեր տեղափոխելու համար»,- ասել է նա: Բարեբախտաբար, այդ պահին անձնակազմը մեքենայում չի եղել, ոչ ոք չի տուժել:
Հիշեցնենք, որ ապրիլի 5-ին Հայաստանի եւ Ադրբեջանի Զինված ուժերի շտաբի պետերը Մոսկվայում պայմանավորվածություն են ձեռք բերել կրակի դադարեցման վերաբերյալ: Նույն օրը ժամը 12:00-ից շփման գծում հարաբերական հանգիստ է. ադրբեջանական կողմը տեղ-տեղ կրակում է, սակայն ոչ նախկին ինտենսիվությամբ:
