ԵԱՀԿ առաքելությունը ուժեղացված դիտարկում է անցկացրել ղարաբաղա-ադրբեջանական շփման գծում՝ Թալիշ գյուղի ուղղությամբ: Հայկական կողմից դիտարկումն անցել է ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկի գլխավորությամբ: Դիտարկման ընթացքում կրակի դադարեցման ռեժիմի խախտումներ չեն արձանագրվել:
Ադրբեջանում բանակը համալրելուն ուղղված որոշում են կայացրել: Մագիստրատուրայում եւ ասպիրանտուրայում սովորողներն այլեւս բանակից տարկետման իրավունք չեն ունենա։ Ադրբեջանում այս որոշումը բացատրել են Արցախի հետ շփման գծում լարվածության աճով:
Ռոբերտ Քոչարյանը մայիսի 11-ին մեկնել է Արցախ եւ հանդիպել Բակո Սահակյանի հետ: Հանդիպմանը քննարկվել են ղարաբաղա-ադրբեջանական շփման գծում ստեղծված իրավիճակը եւ ապրիլյան պատերազմական գործողությունների հետեւանքներին վերաբերող հարցեր:
Վաղը Հովիկ Աբրահամյանը հանդես կգա կարեւոր հայտարարությամբ: Վարչապետն իր հայտարարության անոնսն արել է այսօր լրագրողների հետ զրույցում՝ պատասխանելով Ադրբեջանին ռուսական զենքի վաճառքի վերաբերյալ հարցին:
«Հրազդան ցեմենտը» ազատվեց 500 մլն դրամի տույժից: Հանրապետականը վերջապես կարողացավ անցկացնել աղմկահարույց օրինագիծը Ազգային ժողովի արտահերթ նիստում: Ընդդիմությունը անընդունելի էր համարում այս նախաձեռնությունը՝ հայտարարելով, որ գործարանի նախկին սեփականատեր Միխայիլ Բաղդասարովի պարտքերը պետք է ոչ թե ներել, այլ նրան պատասխանատվության կանչել հարկեր չվճարելու համար: ԱԺ-ն ընդունել է նաեւ կենսաթոշակների պարտադիր կուտակային համակարգի համատարած ներդրումը մեկ տարով հետաձգող օրինագիծը: Ընդդիմությունը կարծում է, որ սա արհեստական հետաձգում է, որն իշխանությունը նախաձեռնել է որպես նախընտրական քարոզչական քայլ:
Խորհրդարանում սկսվել է մաքսանենգությունն ապաքրեականացնող նախագծի քննարկումը։ Դրանով նախատեսվում է մաքսային հայտարարագրերը սխալ կամ թերի լրացնելու դեպքում գործարարներին ազատել քրեական պատասխանատվությունից, բավարարվել միայն տույժերով: ԲՀԿ պատգամավոր Նաիրա Զոհրաբանը ռիսկային է համարել այս նախաձեռնությունը՝ նշելով, որ խոշոր գործարարներին եւ մոնոլոպոլիստներին տուգանքներով վախեցնել չի լինի, նրանց համար այդ տուգանքները չնչին գումարներ են:
Հայաստանում են ԵԽԽՎ մոնիտորինգի խմբի հայաստանյան համազեկուցողները: Նրանք այսօր Ազգային ժողովում հանդիպել են բոլոր խմբակցությունների հետ, քննարկել Ընտրական օրենսգքրի փոփոխությունները: Դաշնակցությունը համազեկուցոներին վստահեցրել է, որ այս հարցի շուրջ քաղաքական եւ հասարակական շրջանակների հետ լայն կոնսենսուսի հնարավորություն կա: Ավելի ուշ՝ լրագրողների հետ զրույցում Արմեն Ռուստամյանն ասել է, որ 4+4+4 ձեւաչափով քննարկումներում արդեն ընդհանուր փաստաթուղթ է մշակվում, սակայն դժվարացել է ասել՝ արդյոք քննարկումներին մասնակցող բոլոր կողմերն են համաձայն այդ փաստաթղթի հետ:
Տիգրան Ուրիխանյանը բացատրել է, թե ինչու է հրաժարվել ցուցմունք տալ իր հաղորդման հիման վրա ձերբակալված եւ շորթման մեջ մեղադրվող Անի Հովհաննիսյանի եւ նրա օգնականի դեմ: «Անալիտիկ» կայքի խմբագիրը, նրա խոսքով, ընդամենը կատարողն է, սա իր քաղաքական գործունեության դեմ պատվիրատուների ձեռքի գործն է: Պատգամավորը խոստացել է ցուցմունք տալ, երբ գործը կհասնի երկու կանանցից շատ ավելի բարձր կանգնած հանցագործների՝ պատվիրատուներին:
Երեւանի Կասյան փողոցում Mercedes մակնիշի ավտոմեքենայի 23-ամյա վարորդը վրաերթի է ենթարկել մոտ 40 տարեկան մի կնոջ, որը ստացված վնասվածքներից տեղում մահացել է։ Նախօրեին Հրազդան քաղաքում 26-ամյա Հարություն Թովմասյանը իր «Վազ» մակնիշի ավտոմեքենայով ավտոտնակ մտնելիս ՝ անզգուշաբար վրաերթի էր ենթարկել դարպասների մոտ կանգնած 3 տարեկան աղջկան, որը նրա ազգականուհին էր: Հարությունը երեխային հասցրել է հիվանդանոց, սակայն ճանապարհին աղջիկը մահացել է:
Երեւանում այսօր երթ է տեղի ունեցել՝ ի պաշտպանություն Թուրքիայի խորհրդարանի հայ պատգամավոր Կարո Փայլանի: «Մենք բոլորս Կարո ենք» գրությամբ պաստառներով ու վանկարկումներով մի քանի տասնյակ քաղաքացիներ երթով հասել են ՄԱԿ-ի երևանյան գրասենյակ, եւ նամակ հանձնել, որով պահանջում են անուշադրության չմատնել ու հետաքննել Թուրքիայի խորհրդարանում Կարո Փայլանի դեմ հարձակումները, նաեւ ապահովել նրա անվտանգությունը:
Երեւանի Էրեբունի համայնքի մաս կազմող Ջրաշենում անասունները սատկում են անհայտ հիվանդությունից: Ջրաշենցիները համոզված են, որ գյուղում դաբաղի համաճարակ է տարածված, սակայն, պատասխանատուները ոչինչ չեն անում` անասուններին փրկելու համար: Գյուղում արդեն 30 կով եւ 6 հորթ է սատկել, վարակվել են նաեւ խոզերը` չեն ուտում, անընդհատ պառկած են ոտքերի ցավի պատճառով: Ջրաշենցիների խոսքով՝ մեղավորը համայնքի անասնաբույժն է, որը ժամանակին չի պատվաստել անասուններին:
Լևոն Մկրտչյանը դպրոցների տնօրեններին, ուսուցիչներին, նաեւ ծնողներին խնդրել է Վերջին զանգի տոնակատարությունները շքեղ չկազմակերպել: ԿԳ նախարարը կոչ է արել հիշել, որ այս պահին խրամատներում մեր երիտասարդներն են կանգնած։ Երկիրը դժվար վիճակի մեջ է։ Կարելի է հավաքվել, ուրախանալ, բայց ավելի համեստ՝ ասել է նախարարը: Նշենք, որ արդեն ահազանգեր կան, որ հատկապես մայրաքաղաքի դպրոցներում Վերջին զանգի եւ ավարտական երեկոների համար խոշոր գումարներ են հավաքում՝ միջինը 100 հազար դրամ:
Ստոկհոլմում կայացած «Եվրատեսիլի» առաջին կիսաեզրափակիչի քվեարկության արդյունքներով Իվետա Մուկուչյանը անցել է եզրափակիչ փուլ: Ելութից հետո Իվետան բարձրացրել էր նաեւ Արցախի դրոշը, ինչի մասին լրագրողները երգչուհուն հարց ուղղեցին մրցույթից հետո կայացած ասուլիսում: «Ես ծնվել եմ Գերմանիայում, բայց հայ եմ եւ միայն խաղաղություն եմ ցանկանում աշխարհին եւ Հայաստանին: Ուզում եմ՝ ամբողջ աշխարհին տարածել, որ ես ուզում եմ խաղաղություն լինի իմ երկրի սահմաններում: Ահա, թե ինչու եմ ներկայացնում այս երգը»,- պատասխանել է Իվետան: Եվրատեսիլի եզրափակիչ փուլը կանցկացվի մայիսի 14-ին: Իվետայի առաջին ելույթը բավական տպավորիչ էր: Հայաստանի մասնակիցը համարվում է հաղթանակի հավանական թեկնածու:
Դոլարը շարունակում է թանկանալ: Ռուբլին եւ եվրոն նույնպես աճել են, ֆունտը՝ նվազել: Դոլարի փոխարժեքը կազմել է 479, եվրոյինը՝ 545, ֆունտինը՝ 691, իսկ ռուբլունը՝ 7.25 դրամ:
Առաջիկա գիշերը Երևանում սպասվում է մինչև 14, իսկ վաղը ցերեկը՝ մինչև 24 աստիճան տաքություն։ Գիշերվա առաջին կեսին ու օրվա երկրորդ կեսին հնարավոր է կարճատև անձրև: