Ադրբեջանական զինուժն այս գիշեր ակտիվ է եղել, հայկական կողմը պատժիչ գործողությունների է դիմել: Գիշերը հակառակորդը տարբեր տրամաչափի զինատեսակներից հրադադարի ռեժիմը խախտել է ղարաբաղա-ադրբեջանական հակամարտ զորքերի շփման գծի ամբողջ երկայնքով: Խախտումներն առավել ակտիվ են եղել Ակնայի եւ Մարտունու պաշտպանական հատվածներում: Արցախի բանակի առաջապահ ստորաբաժանումները պատժիչ գործողությունների են դիմել, հիմնականում՝ Մարտունու ուղղությամբ, հակառակորդին ստիպելով ձեռնպահ մնալ հետագա սադրիչ քայլերից: Ներկայում սահմանագծի ամբողջ երկայնքով իրադրությունը համեմատաբար հանգիստ է:
Գազի սակագնի իջեցմանը հետեւեց նաեւ էլեկտրաէներգիայինը. 2017-ի փետրվարի 1-ից բնակչության համար հոսանքի սակագինը 46.2 դրամի փոխարեն կկազմի 44.98 դրամ՝ մեկ կՎտ/ժ-ի համար: Հանրային ծառայությունները կարգավորող հանձնաժողովի տեղեկացմամբ՝ սակագնի նվազումը հնարավոր է դարձել ավելի թանկ ջերմային էլեկտրաէներգիայի տեսակարար կշռի կրճատման շնորհիվ: Ատոմակայանն իր հերթին կնվազեցնի էլեկտրաէներգիայի բացթողնման սակագները՝ 7.702 դրամից հասցնելով 6.776 դրամի:
Ազգային ժողովում այսօր «մտերմիկ» մթնոլորտ էր: Հատուկ քվեարկությունների համար խորհրդարան եկած հանրապետական գործարար պատգամավորներն այնքան են տարվել անձնական զրույցով, որ մտքերի փոխանակման համար հերթագրվել են՝ կարծելով, թե քվեարկություն է սկսվել: Ընդ որում, հերթագրվել են պատգամավորներ, որոնք գրեթե երբեք ելույթ չեն ունենում. օրինակ՝ Սամվել Ալեքսանյանը, գեներալ Սեյրան Սարոյանը, Առաքել Մովսիսյանը: Արդյունքում Ազգային ժողովի փոխխոսնակն արագորեն հորդորել է կրկին հերթագրվել, իսկ դահլիճում ծիծաղ է տարածվել: Երկրորդ անգամ էլ 5 պատգամավոր է հերթագրվել, դահլիճում նորից ծիծաղել են: Գալուստ Սահակյանն էլ ստիպված քվեարկության է դրել հարցը՝ առանց որեւէ մեկին ձայն տալու:
Իսկ Ազգային ժողովում արտահերթ նստաշրջան էին հրավիրել՝ «Պետական տուրքի մասին» օրենքում փոփոխությունների նախագիծն եւ միջազգային համաձայնագրեր ընդունելու համար: Խորհրդարանն այսօր միանգամից 3 վարկային համաձայնագիր է վավերացրել: Դրանցով պետական պարտքը 190 մլն դոլարով ավելացել է. այս անգամ իշխանությունները վարկ են վերցրել բյուջետային ծախսերի համար:
Վարչապետը շարունակում է ակտիվորեն զբաղվել մարզերի զարգացման եւ ներդրումների հարցով: Կառավարությունում այսօր քննարկել են նախարարությունների, գերատեսչությունների եւ մարզպետարանների գործունեության արդյունքների գնահատման մեխանիզմներն ու հայտանիշերը: Գնահատման հայտանիշերի թվում Կարեն Կարապետյանը կարեւորել է հատկապես ներդրումային ցուցանիշը՝ ինչպես ներքին, այնպես էլ արտաքին: Կարեն Կարապետյանը կարեւորում է նաեւ խնդիրների ուղղությամբ համակարգային մոտեցումը: Այնպիսի համակարգ պետք է ձեւավորել, որտեղ ընդհանուր օղակում յուրաքանչյուր խնդիր անմիջապես բացահայտվի: Գործադիրում այսօր կրկին քննարկել են նաեւ տեղեկատվական և հեռահաղորդակցության տեխնոլոգիաների ոլորտի զարգացման խնդիրները: Հանդիպման մասնակիցների հետ Կարեն Կարապետյանը մեծ հույսեր է կապում, ուզում է, որ հասարակության լոկոմոտիվը դառնան, ինքն էլ, ինչպես բոլորին, նրանց էլ կօգնի:
«Փոքր Մհեր» կրթահամալիրում խնդիրների թնջուկ է գոյացել: Կրթության նախարարությունը դրանց լուծման տարբերակներ է մշակել եւ ներկայացրել կառավարություն: Լեւոն Մկրտչյանի կարծիքով՝ խնդիրը կրթահամալիրում ստեղծված տեղեկատվական փակ համակարգն է: Առաջարկում են համագործակցել պաշտպանության նախարարության հետ, ավագ դպրոցի ձեւաչափը միացնել նախարարության իրավասության ներքո գտնվող կառույցներին եւ այլն:
Խնդիրները շատ են նաեւ հանրակրթության համակարգի այլ բնագավառներում. դպրոցական ծանրաբեռնվածություն, ավագ դպրոցների բեռնաթափում, շենքային պայմանների խնդիր, որն ազդում է կրթության որակի վրա: Ամեն ինչ արվելու է՝ հաջորդ տարվա ընթացքում խնդիրներին աստիճանական լուծում գտնելու համար: Լրագրողների հետ հանդիպմանն անդրադարձ է եղել նաեւ կրթական հաստատությունների քաղաքականացմանը: Լեւոն Մկրտչյանն ընտրություններին ընդառաջ խնդրելու է՝ դպրոցները հնարավորինս զերծ պահել ընտրական գործընթացներից, բայց մանկավարժներին, ոլորտի աշխատողներին ընդհանրապես ապաքաղաքականացնել, ըստ նրա, հնարավոր չէ:
Ողբերգական դեպք Գեղարքունիքում: Դդմաշեն գյուղի տներից մեկում հայտնաբերել են տարեց ամուսինների` 79-ամյա Երվանդ Խաչատրյանի եւ 81-ամյա Շուշանիկ Խաչատրյանի դիերը։ Կինը բազմոցին պառկած է եղել, ամուսինը՝ գետնին բերանքսիվայր ընկած: Հարեւանները մեր թղթակցին ասել են, որ կինը մեկ շաբաթ է՝ անկողնային հիվանդ է: Ըստ տեղեկությունների՝ նրա մոտ կաթվածի նախանշաններ են հայտնաբերվել, բայց դեռ հստակ չէ, թե որն է ամուսինների մահվան պատճառը: Նրանք չորս զավակ ունեն, բոլորն էլ ամուսնացած են: Տան զննությամբ պարզվել է, որ սենյակում գազատար խողովակից ռետինե խողովակներով ինքնաշեն գազի սարքավորում է միացված, վրան՝ սննդի այրված մնացորդներով ալյումինե կաթսա: Չի բացառվում, որ ամուսինները ծխախեղդ են եղել:
Ինքնասպան է եղել՝ նախապես խնդրելով ոչ ոքի չմեղադրել: Սիսիանում տներից մեկում hայտնաբերել են տարեց բնակչի դին՝ կախված վիճակում: Նախնական տեղեկություններով՝ նա ինքնասպանություն է գործել: 70-ամյա տղամարդու գրպանից գրություն են գտել, որում նա խնդրել է իր մահվան մեջ ոչ ոքի չմեղադրել։
Հալեպը վերջնականապես ազատագրվել է, բոլոր գրոհայինները դուրս են բերվել քաղաքից: Սիրիայի բանակի եւ Զինված ուժերի գերագույն հրամանատարությունը հայտարարել է, որ անվտանգությունն ու կայունությունը քաղաքում վերականգնվել է: Այս հայտարարությունից հետո մարդիկ Սիրիայի դրոշներով եւ նախագահ Բաշար Ասադի նկարներով դուրս են եկել Հալեպի փողոցներ՝ տոնելով բանակի հաղթանակը։ Քաղաքի բոլոր մզկիթներում հնչել է ազանը, իսկ եկեղեցիներում զանգեր են ղողանջել: Հալեպի կենտրոնում նաեւ տոնածառ են տեղադրել, իսկ քրիստոնյաները հավաքվել են՝ հետեւելու, թե ինչպես են վառվում դրա լույսերը:
Դոլարն ու եվրոն շարունակում են արժեւորվել: Դեկտեմբերի 23-ին դոլարի փոխարժեքը կազմել է 482 դրամ, եվրոյինը՝ 504, ռուբլունը՝ 7 դրամ 91 լումա, ֆունտինը՝ 591 դրամ:
Դեկտեմբերի 24-ին Շիրակում, Կոտայքում, Արագածոտնում, Արարատում, Արմավիրում եւ Վայոց ձորում թույլ ձյուն է սպասվում, առանձին հատվածներում՝ բուք, ցածր տեսանելիություն: Օդի ջերմաստիճանն էապես չի փոխվի: Երեւանում վաղը ժամանակ առ ժամանակ ձյան թույլ տեղումներ են սպասվում: