Հանրապետականն ու Դաշնակցությունը կոալիցիոն հուշագիր են ստորագրել: Արարողությունը տեղի է ունեցել նախագահական նստավայրում: Ապրիլի 2-ին կայացած ընտրությունների արդյունքում Հանրապետական կուսակցությունը 105 հոգանոց խորհրդարանում 58 մանդատ է ստացել եւ կարող էր ինքնուրույն կառավարություն ձեւավորել, բայց, փաստորեն, նախընտրեց կոալիցիա կազմել ՀՅԴ-ի հետ: Հուշագրում պաշտոնների վերաբերյալ միայն մեկ արձանագրված դրույթ կա. վարչապետի պաշտոնում թեկնածություն առաջադրելու իրավունքը պատկանում է ՀՀԿ-ին:
Իսկ Դաշնակցությունը, ամենայն հավանականությամբ, կպահպանի արդեն ունեցած նախարարական երեք պորտֆելները: Նախարարի պաշտոնում կնշանակվեն նաեւ նույն անձինք՝ Արծվիկ Մինասյանը, Լեւոն Մկրտչյանն ու Դավիթ Լոքյանը: Թեեւ պաշտոնների բաշխման մասին դեռեւս պաշտոնապես չի հայտարարվել, բայց դաշնակցական նախարարներն արդեն դիմում են ներկայացրել եւ հրաժարվել պատգամավորի մանդատից:
Մեծ աղմուկ է բարձրացրել Նիկոլ Փաշինյանի՝ 15.000 դրամ սոցիալական աջակցության մասին հայտարարությունը: «Ելք» դաշինքի քաղաքապետի թեկնածուն հայտարարել է, որ յուրաքանչյուր քաղաքացի, ով կհրաժարվի ընտրակաշառքով քվեարկելուց, իրենց հաղթանակից հետո 15 հազարական դրամ կստանա:
«Երկիր Ծիրանի»-ից քաղաքապետի թեկնածուն այսօր դատապարտել է մրցակցի հայտարարությունը: Զարուհի Փոստանջյանը նաեւ հայտարարել է, որ դրանում քրեական պատասխանատվության տարր կա: Նիկոլ Փաշինյանն իր հայտարարությունը բացարձակապես օրինական է համարում, կարծում է, որ այս առաջարկով կարող է արմատախիլ անել ընտրակաշառքի եւ կարուսելի պրակտիկան, իսկ Փոստանջյանին առաջարկում է դիմել իրավապահներին: Փոստանջյանը, կարծես, վիրավորված է իր երբեմնի խորհրդարանական գործընկերոջից. Ազգային ժողովում աշխատելու տարիներին իր ոչ մի ներկայացրած օրինագծի կողմ չի քվեարկել: Ինչ վերաբերում է Փոստանջյանի դիտարկմանը, թե Նիկոլ Փաշինյանն օրինականացրել է ապրիլի 2-ի, իր բնորոշմամբ՝ խայտառակ ընտրությունները, քաղաքապետի թեկնածուն նշել է, որ դրանք ավելի խայտառակ չէին, քան նախորդ ընտրությունները, որոնց արդյունքում Փոստանջյանն ինքը տարիներ շարունակ Ազգային ժողովում է եղել:
Արցախում շփման գծի հյուսիսային հատվածում գնդակոծության է ենթարկվել «Շանթ» հեռուստաընկերության «Դիրքերում» հաղորդաշարի նկարահանող խումբը: Ավտոմեքենայի գնդակոծման հետեւանքով օպերատոր Դավիթ Աթոյանը վիրավորվել է: Նրան Ստեփանակերտ են տեղափոխել: Հեռուստաընկերությունից հայտնում են, որ Դավիթ Աթոյանը լուրջ վիրավորում է ստացել: Նրան, հավանաբար, Երեւան կտեղափոխեն:
Իսկ ադրբեջանական զինուժը գիշերը, ավանդույթի համաձայն, խախտել է հրադադարի ռեժիմը. հայ դիրքապահների ուղղությամբ շուրջ 1700 կրակոց է արձակվել: Հակառակորդը նաեւ Թալիշի ուղղությամբ զրահատեխնիկայի տեղաշարժ է կատարել՝ շուրջ 10 տանկ: Կեսօրից հետո դրանք վերադարձել են իրենց ելման շրջաններ: Օպերատիվ իրավիճակն առաջնագծում արդեն հանգիստ է:
Երեք օր անց հայտնաբերել են Արցախի զորամասերից մեկի մոտ ջրամբարում ջրահեղձ եղած զինծառայող Ռուբեն Մնացականյանի դին: Նա Արմավիրի մարզի Գայ գյուղից էր, ընտանիքի ավագ որդին. իրենից փոքր եղբայր ունի: Հիշեցնենք, որ մայիսի 8-ի առավոտյան ճանապարհա-տրանսպորտային պատահարի հետեւանքով զորամասին հարակից ջրամբարում ջրահեղձ են եղել պաշտպանության բանակի զինծառայողներ Ռուբեն Բարսեղյանը, Ռաֆայել Բիշարյանը եւ Ռուբեն Մնացականյանը: Դեպքի առիթով քրեական գործ է հարուցվել:
Իսկ Հայաստանի զորամասերից մեկում հրազենային վիրավորումից մահացած ժամկետային զինծառայող Գագիկ Մեսրոպյանը Տավուշի մարզի Տեղ գյուղից էր: Նա ընտանիքի միակ որդին էր, բնակվում էր մոր հետ՝ սոցիալական ծանր պայմաններում:
Կրտսեր սերժանտին սպանելու կասկածանքով ձերբակալվել է նրա ծառայակիցը՝ Գորիսի Հարթաշեն գյուղի բնակիչ Արման Հակոբյանը: Քննչական կոմիտեի տեղեկացմամբ՝ բավարար փաստական տվյալներ են ձեռք բերվել, որ Գագիկ Մեսրոպյանը սպանության զոհ է դարձել: Արմանի եղբայրը՝ Ալիկը, սակայն, պնդում է, որ եղբայրը չէր կարող սպանել Գագիկին, նրանք մտերիմ ընկերներ էին: Ալիկ Հակոբյանը պատմել է, որ տղաները դիրքերում են եղել, Գագիկը կատակել է, քար նետել եղբոր վրա: Մութ է եղել եւ Արմանը մտածել է, թե հակառակորդն է ու կրակել է: Ալիկ Հակոբյանը պնդում է, որ դիտավորություն չի եղել:
Կառավարության այսօրվա նիստում վարչապետի հանձնարարականները հիմնականում վերաբերում էին կրթության ոլորտին: Կարեն Կարապետյանն առաջարկում է օպտիմալացնել դպրոցները, բայց դա չպետք է արվի ուսուցիչների ծանրաբեռնվածության ավելացման կամ երկրորդ հերթափոխ ավելացնելու հաշվին: Կրթության նախարարը 15 օր ժամանակ ունի՝ առաջարկներ ներկայացնելու համար: Նախարարությանը նաեւ երկու ամիս ժամանակ տրվեց՝ «Բարձրագույն կրթության մասին» լրամշակված օրինագիծ ներկայացնելու, եւ չորս ամիս՝ ուսանողների աջակցության եւ թոշակների բաշխման նոր մեխանիզմներ մշակելու համար:
Վարչապետը դժգոհեց կառավարության եւ հանրապետական գործադիր մարմինների գործունեությունից. տրված հանձնարարականները պատշաճ եւ սահմանված ժամկետներում չեն կատարվում: Դավիթ Հարությունյանին հանձնարարեց խստորեն հետեւել հանձնարարականների կատարմանը:
Փոխարենը վարչապետը գոհ էր Դավիթ Տոնոյանի ներկայացրած ծրագրից: Նոր՝ հրթիռային եղանակով հակակարկտային պաշտպանության պիլոտային ծրագիր է իրականացվելու: Այդ նպատակով 17 մլն դրամ կհատկացվի: Ծրագրի հետ վարչապետը մեծ հույսեր է կապում:
Չինաստանը Հայաստանին 200 նոր շտապօգնության մեքենա կնվիրի: Վարչապետը հետաքրքրվեց մեքենաների տեղափոխման ժամկետներով: Մարտունիում էլ Հիվանդությունների վերահսկման եւ կանխարգելման ազգային կենտրոնին հողատարածք կտրամադրվի՝ ԱՄՆ կառավարության աջակցությամբ նոր լաբորատորիա կառուցելու համար: Լաբորատորիայի հին շենքն էլ կնվիրեն այժմ այնտեղ բնակվող ընտանիքներին:
Իսկ կառավարության այսօրվա նիստը վերջինն էր արդարադատության նախարարի համար: Ապրիլի 2-ի ընտրությունների արդյունքում ՀՀԿ-ի ընտրացուցակով առաջադրված Արփինե Հովհաննիսյանը պատգամավորական մանդատ է ստացել: Կարապետյանը շնորհավորեց Հովհաննիսյանին:
Արդեն միջանցքում լրագրողները հարցեր ունեին Սուրեն Կարայանին: Հետաքրքրվեցին հայտարարած ներդրումների եւ ակնկալվող նոր աշխատատեղերի մասին: Ներկայացված թվերը խոսուն են:
Տրանսպորտի նախարարից էլ հարցրեցին ճանապարհների վիճակից: Տավուշցիները դժգոհ են, Իջեւանում նույնիսկ միջպետական ավտոմայրուղին են փակել: Վահան Մարտիրոսյանը հավաստեց, որ 15-20 օրվա ընթացքում փոսալցման եւ ասֆալտապատման աշխատանքները կավարտվեն: Նախարարը նաեւ հորդորեց լավն էլ տեսնել: Իսկ հնարավոր չէ՞ միանգամից կապիտալ շինարարություն կատարել եւ ամեն տարի նույն խնդրի առջեւ չկանգնել: Հարցին նախարարը պատասխանեց. հսկայական միջոցներ են անհրաժեշտ, որոնք չունենք:
Երեւանում արտակարգ դեպք է տեղի ունեցել. բնակարանում կախված վիճակում երկու տղամարդու դի են հայտնաբերել: 29-ամյա Սեւակ եւ 63-ամյա Հարություն Հակոբյաններին հայտնաբերել է ընտանիքի մյուս որդին: Պարզվել է, որ հայրը որդուն պատշգամբում կախված է գտել, ինչից հետո ինքն էլ ինքնասպան է եղել: Բնակարանում միայն տղամարդիկ էին՝ հայրն ու երկու որդիները: Մահացածն ընտանիքի ավագ որդին էր, իսկ փոքրը մտավոր զարգացման հետ կապված խնդիրներ ունի: Հարեւանի խոսքով՝ Հակոբյանները ոչ ոքի հետ չէին շփվում, տանից գրեթե դուրս չէին գալիս, սոցիալական ծանր պայմաններում էին ապրում:
Ո՞վ կդառնա ԱՄՆ-ի Հետաքննությունների դաշնային բյուրոյի նոր ղեկավարը: Ջեյմս Կոմիի պաշտոնանկությունից հետո այսօր արդեն ամերիկյան լրատվամիջոցներում նրան փոխարինողի անուններ են շրջանառվում, որոնց թվում նաեւ կոնգրեսականի եւ նահանգապետի անուններ կան:
Իսկ ընդդիմադիրները դժգոհություն են հայտնել Կոմիի պաշտոնանկության կապակցությամբ: Նշենք, որ Ջեյմս Կոմին հետաքննում էր ԱՄՆ նախագահ Դոնալդ Թրամփի աշխատակիցներին՝ «Ռուսաստանի հետ կապերի» գործով, ինչը հերքում էին ինչպես Սպիտակ տանը, այնպես էլ Կրեմլում: Նախագահ Թրամփը, սակայն, վստահեցնում է, որ Կոմիին աշխատանքից ազատել է ոչ թե հետաքննության, այլ վատ աշխատանքի պատճառով: Նշելով, որ Վաշինգտոնում բոլորը դժգոհ էին Կոմիի աշխատանքից, Թրամփը վստահություն է հայտնել, որ երբ կրքերը հանդարտվեն, իրեն դեռ շնորհակալություն կասեն որոշման համար:
Մայիսի 11-ին դոլարն ու եվրոն թանկացել են: Արդյունքում դոլարի փոխարժեքն այսօր կազմել է 484 դրամ, եվրոյինը՝ 526, ռուբլունը՝ 8 դրամ 49 լումա, ֆունտինը՝ 626 դրամ:
Մայիսի 12-ին հանրապետության շրջանների մեծ մասում ժամանակ առ ժամանակ անձրեւ եւ ամպրոպ է սպասվում, առանձին հատվածներում հնարավոր է կարկուտ: Երեւանում նույնպես վաղը ժամանակ առ ժամանակ տեղումներ կլինեն, քամու ուժգնացում է սպասվում: Մայրաքաղաքում գիշերը կդիտվի +13+15, ցերեկը՝ +24+26 աստիճան տաքություն: