Սյունիքում անցած տարվա աշնանն անչափահասների կողմից կեղծ փողեր պատրաստելու, պահելու եւ իրացնելու գործով դատավճիռ է կայացվել:
Սյունիքի մարզի ընդհանուր իրավասության դատարանը որոշում է կայացրել գործով ամբաստանյալներ, անչափահասներ Ալենին, Արմանին եւ Կարենին մեղավոր է ճանաչել եւ դատապարտել 2 տարվա ազատազրկման: Դատարանը որոշել է նրանց պատիժը պայմանականորեն չկիրառել՝ սահմանելով փորձաշրջան 2 տարի ժամկետով:
Ավելի վաղ Քննչական կոմիտեն հայտնել էր, որ 2016թ. նոյեմբերին Սյունիքի մարզի երեք անչափահաս բնակիչներ՝ 1999 եւ 2000թթ. ծնված, տպիչով կրկնօրինակելու եղանակով պատրաստել են 20.000 ՀՀ դրամ անվանական արժեքով թղթադրամ, որն իրացրել են նոյեմբերի 28-ին` Սյունիքի մարզի Լեռնաձոր գյուղի խանութում։ Պատանիներից մեկը կեղծ թղթադրամով կատարել է գնումներ։
Նախաքննության ընթացքում պարզ էր դարձել, որ անչափահասներ Ալենը, Արմանն ու Կարենը նոյեմբերին տպող սարքով կրկնօրինակելու եղանակով պատրաստել էին 3 հատ 20 հազար ՀՀ դրամ անվանական արժեքով կեղծ թղթադրամ: Դրանցից մեկով Ալենն ու Կարենը կատարել էին գնումներ և վերցրել վերադարձված մանրը: Նոյեմբերի 26-ին կամ 27-ին երեկոյան Կարենն ու Ալենը Կապանի խանութներից մեկում մանրելու պատրվակով մեկ 20 հազար դրամ տվել են վաճառողուհուն եւ ստացել մանրը: Դրանից մեկ օր անց արդեն տղաները մարզի Լեռնաձոր գյուղում գտնվող խանութում կատարել են գնումներ եւ վճարել 3-րդ 20 հազար դրամով:
Երեքին էլ մեղադրանք էր առաջադրվել Քրեական օրենսգրքի 202-րդ հոդվածի 2-րդ մասի 2-րդ կետով (կեղծ փողեր կամ արժեթղթեր պատրաստելը, պահելը կամ իրացնելը, որը կատարվել է մի խումբ անձանց կողմից նախնական համաձայնությամբ):
