Հայաստանի ինքնիշխան իրավունքն է զարգացնել համագործակցությունն ում հետ ուզում է: Այս մասին, այսօր՝ սեպտեմբերի 12-ին, Բնապահպանության նախարարությունում ՌԴ կողմից ֆինանսավորվող «Հայաստանում կլիմայի փոփոխության ազդեցության մեղմումն անտառային և դաշտային հրդեհների կառավարման ներուժի զարգացման միջոցով» ծրագրի փաստաթղթի պաշտոնական ստորագրման արարողության ժամանակ լրագրողների հետ զրույցում նշել է Հայաստանում ՌԴ դեսպան Իվան Վոլինկինը:
Հարցին՝ արդյոք հայ-չինական ռազմատեխնիկական ոլորտում համագործակցությունը կարո՞ղ է ազդել հայ-ռուսական դաշնակցային հարաբերությունների վրա, Վոլինկինը պատասխանեց. «Հայաստանի ինքնիշխան իրավունքն է զարգացնել համագործակցությունն ում հետ ուզում է: Հայաստանի եւ Ռուսաստանի միջեւ բարեկամություն է, չի կարելի բարեկամություն անել ինչ-որ մեկի դեմ, բարեկամությունը սրտից է գալիս: Իսկ որեւէ մեկի դեմն արդեն բարեկամություն չէ»:
Դեսպանի խոսքով, Ռուսաստանը չի քննադատել ռազմական ոլորտում հայ-չինական համագործակցությունը:
