Մենք դեռ պարտվում ենք կլիմայի փոփոխության դեմ պայքարում, ասել է ՄԱԿ գլխավոր քարտուղար Անտոնիո Գուտերեշը՝ ելույթ ունենալով Փարիզում «Մեկ մոլորակ» գագաթաժողովում: Նա ընդգծել է «կանաչ տնտեսության» առավելությունները եւ կոչ է արել ներդրումներ կատարել նոր տեխնոլոգիաների եւ վերականգնվող էներգիայի աղբյուրների մեջ, որոնք արդեն ապացուցել են իրենց արդյունավետությունը:
«Մենք պայքարում ենք մոլորակում կյանքի գոյության համար, այն ձեւով, ինչպիսին այժմ է, բայց մենք ունենք կարեւոր դաշնակիցներ՝ գիտություն եւ տեխնոլոգիաներ», - ասել է գլխավոր քարտուղարը:
Գուտերեշը հիշեցրել է, որ հարուստ երկրները երկու տարի առաջ տվել են խոստում. զարգացող երկրներին ամեն տարի 100 մլրդ դոլար հատկացնել կլիմայի փոփոխության հետեւանքների մեղմացման եւ դրանց հարմարվելու ծրագրերի համար: Այս նպատակների համար ստեղծվել է այսպես կոչված «Կանաչ հիմնադրամ», որը համալրման կարիք ունի: