Վայոց ձորի Ջերմուկ քաղաքում բժշկի կողմից մասնագիտական պարտականությունները ոչ պատշաճ կատարելու հետեւանքով հիվանդին մահվան հասցնելու մեջ մեղադրվող՝ «Շտապօգնության» բժիշկ Արտակ Գեւորգյանը դատապարտվեց 2 տարվա պայմանական ազատազրկման:
Ըստ մեղադրանքի՝ Ջերմուկի առողջության կենտրոնի «Շտապօգնության» բժիշկ Արտակ Գեւորգյանը 2016թ. նոյեմբերի 3-ին Գրիգոր Գրիգորյանին առաջին բուժօգնություն ցուցաբերելու ընթացքում իր մասնագիտական պարտականությունները կատարել է ոչ պատշաճ՝ դրանց նկատմամբ դրսևորելով անփույթ և անբարեխիղճ վերաբերմունք, ինչն անզգուշությամբ առաջացրել է Գրիգոր Գրիգորյանի մահը: Այսպես, Արտակ Գևորգյանը հիվանդ Գրիգոր Գրիգորյանից տեղեկացել է, որ սրտի շրջանում ունի ցավեր և ցանկանում է անցնել էլեկտրասրտագրության հետազոտություն: Առանց էլեկտրասրտագրություն կատարելու՝ բժիշկը բուժքրոջը ցուցում է տվել կատարել դեղորայքային ներարկում: Դա լսելով՝ Գրիգոր Գրիգորյանը և նրա ընտանիքի անդամները տեղեկացրել են հիվանդի՝ դեղորայքից ալերգիկ լինելու մասին: Սակայն Արտակ Գեւորգյանը ցուցում է տվել կատարել ներարկումը: Ներարկումից անմիջապես հետո Գրիգոր Գրիգորյանի մոտ առաջացել է շոկային վիճակ, նա կորցրել է գիտակցությունը: Դրանից հետո նույնպես, ըստ մեղադրանքի, Արտակ Գեւորգյանն առաջին օգնության պրեպարատի՝ ադրենալինի ներարկման ձևի և չափաքանակի վերաբերյալ բուժքրոջը տվել է ոչ ճիշտ ցուցում: Բժշկի ցուցումով կատարված ներարկումներից հետո Գրիգորյանը րոպեներ անց մահացել է:
Արարատի եւ Վայոց ձորի մարզերի ընդհանուր իրավասության դատարանը Գեւորգյանին մեղավոր է ճանաչել Քրեական օրենսգրքի 130-րդ հոդվածի 2-րդ մասով և նրան դատապարտել ազատազրկման 2 տարի ժամկետով՝ բժշկական գործունեության իրավունքի զրկմամբ՝ 3 տարի ժամկետով: Դատարանը վճռել է պատիժը պայմականորեն չկիրառել՝ սահմանելով փորձաշրջան 2 տարի ժամկետով:
Ավելի վաղ Քննչական կոմիտեն հաղորդել էր, որ Վայոց Ձորի Ջերմուկ քաղաքում նոյեմբերի 3-ին շտապօգնություն կանչած Գրիգոր Գրիգորյանին բժիշկները դեղ են ներարկել, որից հետո քաղաքացին գիտակցությունը կորցրել է եւ մահացել: Քաղաքացուն մի շարք ներարկումներ են կատարվել, հաշվի չի առնվել նրա ալերգիկ լինելու հանգամանքը, որի արդյունքում քաղաքացին գիտակցությունը կորցրել է եւ մահացել: Քրեական գործ է հարուցվել ՔՕ 130-րդ հոդվածի 2-րդ մասով՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը:
