Լարսի փակ անցակետում արդեն 4-րդ օրը բեռնատարով մնացած վարորդ Գեղամ Բարսեղյանն ահազանգում է՝ բազմաթիվ վարորդներ անելանելի վիճակում են հայտնվել, ոչ մեկն իրենց օգնություն չի ցուցբերում: NEWS.am-ի հետ զրույցում այսօր՝ դեկտեմբերի 26-ին, Գեղամ Բարսեղյանը նշեց՝ բազմաիթվ բեռնատարեր Վլադիկավկազ չհասած, սահմանից 60 կիլոմետր հեռավորության վրա կանգնած են եւ պատասխանատուներից ոչ ոք չկա, որից հնարավոր կլինի ճշտել, թե ինչքան ժամանակ են այդպես մնալու:

«Անելանելի վիճակում ենք արդեն 4-րդ օրը, ահավոր շատ ենք, հաշիվ չեմ կարա ասեմ, լավ էսպես մինչեւ ե՞րբ ենք մնալու: Ոչ մեկի հետ էլ խոսալ չի լինում, արհամարհում են, անմարդկային վերաբերմունք ա լրիվ: Պատասխանատու մարմիններից ոչ մեկը չկա էստեղ, լրիվ անհասկանալի վիճակում ենք»,-ասաց նա:

Համաձայն Դոնի Ռոստովում ՀՀ գլխավոր հյուպատոսությունից ստացված տեղեկատվության՝ Վերին Լարս անցակետի հատվածում կուտակված ՀՀ քաղաքացիների համար ՌԴ ԱԻՆ-ի կողմից տեղադրվել են վրաններ, դաշտային խոհանոց՝ քաղաքացիներին տաք սնունդ եւ անհրաժեշտ այլ օգնություն ցուցաբերելու համար:  Արդյոք նման բան կա, թե չկա, Գեղամ Բարսեղյանը պատասխանեց. «Հիմա Վրաստան չմտած, սահմանից 60 կմ հեռավորության վրա կանգնած ենք, ոչ մեկը ոչ մոտենում է, ոչ ասում ա՝ ինչի կարիք ունեք, ոչ վրան կա, ոչ էլ սնունդ: Մենք ոչ մի բան էլ չենք ուզում իրենցից, թող մտածեն, թե ոնց կարանք էստեղից էթանք, մեզ էդքանն հերիք ա: Վլադիկավկազ չմտած կանգնեցրել են, չգիտենք էլ վերեւում ավտո կա, թե չկա»,-ասաց նա:

Ավելի վաղ NEWS.am-ը հայտնել էր, որ Վրաստանի ՆԳՆ ԱԻ դեպարտամենտից ստացված տեղեկատվության համաձայն Ստեփանծմինդա-Լարս ավտոճանապարհը բաց է միայն մինչեւ 12 տեղանոց մարդատար ավտոմեքենաների համար:

ՌԴ ԱԻՆ Հյուսիսային Օսիայի ՃԿԿ-ից ստացված տեղեկատվության համաձայն ռուսական կողմում կա կուտակված 385 բեռնատար: