Տասնյակ տարիներ մեր երկրում եղել են քաղաքական հաշվեհարդարներ, քաղաքական նպատակահարմարությունից ելնելով դատավճիռներ, քաղաքական տարբեր նկատառումներից ելնելով որոշումներ եւ դեռ լինելու են, քանի դեռ չունենք անկախ դատական համակարգ, որը չի եղել իշխանական բուրգի կրկի տակ, անվստահությունը պահպանվելու է իշխանության հանդեպ: Այս մասին, այսօր՝ հունվարի 16-ին, ԱԺ-ում «Ոստիկանության մասին» ՀՀ օրենքում փոփոխությունների վերաբերյալ օրենքի նախագծի քննարկման ժամանակ նշեց «Ծառուկյան» խմբակցության պտգամավոր Նաիրա Զոհրաբյանը (ֆոտոռեպորտաժ):
«Սա նույնն է, որ ասենք՝ եկեք մարդու վրա դնենք ժուչոկներ, որովհետեւ նա պատահաբար, ինչ-որ մի տեղ հանցագործության ականատես կամ մասնակից կարող է լինի: Այստեղ ունենք վստահության ճգնաժամի խնդիր եւ իրավունք ունենք կասկածելու, որ այս նախագիծը ենթատեքստում բոլորովին այլ դրդապատճառներ է պարունակում: Մենք բոլորս գիտենք, թե ինչ հետեւանքներ կարող է ունենալ առաջին հայացքից անմեղ թվացող առաջարկը»,-ասաց նա:
Իր հերթին «Ելք» խմբակցության պատգամավոր Էդմոն Մարուքյանը նկատեց, որ շատ երկրներում մարդու անձնական կյանքի անձեռնմխելիության ապահովման պատճառով արագաչափերն են անգամ հանել, իսկ մենք քննարկում ենք տեսախցիկների դաշտն ընդլայնելու հարցը: Չկա վստահություն, թե ոնց են օգտագործելու այդ նյութերը: Ի՞նչ երաշխիքն ունենք, որ մարդու անձնական կյանքի տիրույթ չեն մտնի, շանտաժ չեն անի մարդկանց: Մենք գիտենք, թե ոնց է չարաշահվում օրենքը»:
Ավելի վաղ NEWS.am-ը հայտնել էր, որ ըստ ՀՀ փոխոստիկանապետ Վարդան Եղիազարյանի, «Ոստիկանության մասին» ՀՀ օրենքում փոփոխությունների վերաբերյալ օրենքի նախագիծը նախատեսում է հանցագործությունը կանխելիս կամ բացահայտելիս հասարակական կարգի պահպանությունը, այդ թվում ճանապարհային երթեւեկության անվտանգության ապահովելիս, ոստիկանության ծառայողներին իրավունք վերապահել օգտագործել տեսաձայնագրող կամ լուսանկարահանող տեխնիկական միջոցներ: Ըստ այդմ, օրենքի մակարդակով կամրագրվեն տեխնիկական միջոցների ամրագրման հիմքերը, կարգը, տվյալների պահպանման ժամկետները, կապահովվի տեղեկությունների հավաքման եւ օգտագործման նպատակի լեգիտիմությունը. այսինքն կհաստակեցվեն մասնավոր կյանքի ոլորտ ոստիկանական միջամտության սահմանները: «Հաշվի առնելով տվյալների մշակման համաչափության սկզբունքը, նախագծում տվյալների պահպանման ժամկետ է ընտրվել 7 օրը, որից հետո դրանք պետք է ոչնչացվեն»,-նշել էր նա: