Դանիայի ԱԳ նախարար Անդերս Սամուելսենը հրաժարվել է մեկնաբանել Կատալոնիայի նախկին առաջնորդ Կառլես Պուչդեմոնի այցը Կոպենհագեն՝ նշելով, որ հենց նոր է իմացել այդ իրադարձության մասին, փոխանցում է «ՌԻԱ Նովոստի»-ն:
«Դա իմ իրավասության ներքո չէ, այս հարցը արդարադատության նախարարության իրավազորության ներքո է: Ես այդ կապակցությամբ մեկնաբանություններ չունեմ»,- ԵՄ երկրների ԱԳ նախարարների նիստից առաջ ասել է նա լրագրողներին:
Նշենք, որ Բրյուսելում փաստաբանական կորպուսում աղբյուրը հայտնել է, որ Պուչդեմոնը, հնարավոր է, Բելգիայում բնակության հայտ ներկայացնի:
Պուչդեմոնը եւ Կատալոնիայի կառավարության եւս 4 նախկին խորհրդականներ, որոնց դեմ Իսպանիայում մեղադրանքներ են առաջադրված, 2 ամիս առաջ Բելգիա են մեկնել: Այդ ժամանակից ի վեր Պուչդեմոնը Բելգիայի տարածքը չէր լքել:
Իսպանիայի դատախազությունն իր հերթին դիմել է երկրի գերագույն դատարանին Կառլես Պուչդեմոնին կալանավորելու եվրոպական օրդեր տալու խնդրանքով, որը հունվարի 22-ին Բելգիայից Դանիա է մեկնել՝ մասնակցելու Կոպենհագենի համալսարնում անցկացվող գիտաժողովին, որը նվիրված է իսպանական շրջանի ապագային: