Մոտ օրերս ՀՀԿ կողմից նախագահի թեկնածու առաջադրված Արմեն Սարգսյանը կհանդիպի հանրապետության նախագահ Սերժ Սարգսյանի հետ: Այս մասին այսօր՝ փետրվարի 14-ին, լրագրողների հետ զրույցում ասաց Արմեն Սարգսյանը:
«Մեր հանդիպումը չի լինելու բաց, որ ես հանդիպեմ նախագահին, ասեմ՝ ընդունում եմ, որովհետեւ մեր հարաբերությունները ոչ միայն ընկերական, բարեկամական, այլ նաեւ դեսպանի եւ նախագահի հարաբերություններ են, տվյալ դեպքում լինելու են նաեւ աշխատանքային քննարկումներ»,-ասաց Արմեն Սարգսյանը:
Անդրադառնալով հարցին, թե ինչ են ակնկալում իրենից մտավորականությունը, հանրությունը, Արմեն Սարգսյանը ասաց, որ ամենադժվարը մարդկանց մտածողությունը փոխելն է:
«Հասարակությունը հսկայական ակնկալիքներ ունի սկսած նրանից, որ հանրության մոտ կա իներցիոն մի մտածողություն, որ նախագահը մեկն է, որ ունի վերեւից ներքեւ ուղղաձիգ իշխանություն, եւ հակառակը՝ ասում են, որ նախագահի լիազորությունները չկան, կամ այնքան քիչ են, որ նախագահը ոչինչ չի կարող անել: Սա ասում է ե՛ւ հանրությունը ե՛ւ կուսակցությունները, իսկ սա ամենացավալի իրողություն է, քանի որ ցանկացած փոփոխություն տեղի է ունենում մտածողության պատճառով:Ամենամեծ դժվարությունը մեր երկրում այն է, որպեսզի մարդիկ հույս ու հավատ ունենան»,- ասաց նա:
Նշենք, որ ՀՀ նախագահը ընտրությունը Ազգային ժողովում տեղի կունենա մարտի 2-ին:
