Նիդերլանդների ֆինանսների նախարարության պետական քարտուղար Մեննո Սնելը Երեւանում կմասնակցի Հայոց ցեղասպանության 103-ամյակի միջոցառումներին:
Նիդերլանդներից պետական պաշտոնյան նման միջոցառմանն առաջին անգամ կմասնակցի, հայտնում է NL Times-ը: Այսուհետեւ Նիդերլանդների պետնախարարը Երւանում անցկացվող միջոցառումներին մասնակցելու համար կժամանի յուրաքանչյուր 5 տարին մեկ:
Հիշեցնենք, որ փետրվարին Նիդերլանդների խորհրդարանի ստորին պալատը հավանություն էր տվել Հայոց ցեղասպանությունը ճանաչող բանաձեւին: Պատգամավորները նաեւ պահանջել էին, որպեսզի Նիդերլանդները ներկայացուցիչ ուղարկի Ցեղասպանության տարելիցին նվիրված միջոցառումներին:
Ինչպես հայտնում է NL Times-ը, Հայոց ցեղասպանությունը ճանաչելուց հետո թուրքական լրատվամիջոցները քննադատել էին թուրքական ծագմամբ պատգամավորներին: Թուրքական կայքերից մեկը հրապարակել էր նրանց անունները եւ լուսանկարները՝ «Հինգ թուրքեր, որոնք հայրենիքը դավաճանել են» վերտառությամբ: