Թուրքիայում ոստիկանությունը ձերբակալել է Ռուսաստանի դեսպան Անդրեյ Կառլովի սպանության եւս մեկ կասկածյալի, հաղորդում է Kommersant.ru-ն՝ հղում անելով Anadolu-ին:
Նա ընդդիմադիր իսլամական քարոզիչ Ֆեթհուլլա Գյուլենի կազմակերպության անդամի կինն է՝ Այշե Սյոգուտը:
Հաղորդվում է, որ նրա ամուսին Շախին Սյոգուտն է «վերահսկել» ռուս դիվանագետի մարդասպանին: Նա կալանավորվել է ապրիլին: Anadolu-ի հաղորդմամբ Սյոգուտը նախկինում ցուցմունք է տվել դատախազին եւ երկրից չբացակայելու ստորագրությամբ բաց թողնվել: Մեղադրական կողմը դրան դեմ է արտահայտվել եւ նրան կալանավորելու կարգադրագիր տվել:
Հարձակումը կատարել է Թուրքիայում ոստիկանության աշխատակից Մեւլութ Ալթինթաշը, որը հանցագործության վայրում սպանվել էր: Ռուսական դեսպանին սպանելու գործով 8 մարդ է կալանավորվել, որոնցից 4-ը նախկին ոստիկաններ են: Թուրքական իշխանությունները կատարվածի համար մեղավոր են համարում FETO-ին:
