Դեն Բիլզերյանն ընտանիքի ու ընկերների հետ այսօր Արցախում էր: Նրանք Ստեփանակերտ են մեկնել ուղղաթիռով, իսկ օդանավակայանից նրանց ուղեկցել են զորավարժարան: Ամերիկահայ միլիոնատերն առաջին անգամ է Արցախում:
Արցախի պետական հեռուստատեսությանը տված հարցազրույցում Դեն Բիլզերյանն ասել է՝ ուզում է հայրենիքում լավ ժամանակ անցկացնել: «Մարդկանց հետ շփումը շատ լավ էր, ամեն ինչ շատ հրաշալի է»,- ասել է Դեն Բիլզերյանը:
Դենի եղբայրը՝ Ադամ Բիլզերյանն էլ ասել է՝ իրեն հայ է զգում. «Ես ինձ հայ եմ զգում, եւ ոչ միայն նրա համար, որ ազգանունս «յան»-ով է ավարտվում: Ինձ բոլորը որպես հայ են ընկալում: Գուցե նաեւ դա է պատճառը, որ ես այստեղ ինձ ինչպես տանն եմ զգում»:
Բիլզերյաններն Արեւմտյան Հայաստանի Խարբերդ նահանգից են: Բիլզերյանն Արցախում է հոր եւ եղբոր հետ: Հայրը ՀՀ քաղաքացիություն է ստացել մի քանի տարի առաջ, որդիներն էլ, ՀՀ անձնագիր ստանալով, հաշվառման են կանգնել զինված ուժերում: Փոլ Բիլզերյանն ասել է՝ պատրաստ է նաեւ ինքը պաշտպանել հայկական հողը:
«Ես շատ եմ ուզում, որ պատերազմ չլինի, եւ Ադրբեջանում հասկանան, որ սա հայկական հող է: Բայց եթե հանկարծ այդպես չստացվի, ոչ միայն իմ որդիները, այլեւ ես պատրաստ ենք գալ ու մեր պարտքը կատարել»,- ասել է Դեն Բիլզերյանի հայրը:
