նախընտրելի դարձնել
Ֆրանսիայի արտգործնախարար Ժան-Նոել Բարոն Իլոն Մասկին մեղադրել է X սոցիալական ցանցում եվրոպացի քաղաքական գործիչների դեմ լայնածավալ հետապնդման արշավներ կազմակերպելու մեջ, գրում է բրիտանական The Guardian-ը։
Ըստ նախարարի՝ օտար ուժերը փորձում են ապակայունացնել Ֆրանսիան 2027 թվականի նախագահական ընտրություններից առաջ՝ օգտագործելով սոցիալական ցանցերը հասարակական հակասությունները խորացնելու համար։
Երեքշաբթի ելույթ ունենալով Տնտեսական համագործակցության և զարգացման կազմակերպության (ՏՀԶԿ) համաժողովում՝ Բարոն հայտարարել է, որ ժողովրդավարությունը թուլացնել ձգտող ուժերը զգալի ազդեցություն են ստացել տեղեկատվական տարածքի վրա և հասարակության բևեռացմանն ուղղված մեթոդներ են կիրառում։
«Նրանք ուժեղացնում են մեր հասարակությունների բևեռացումը»,- ասել է նախարարը։ Նրա գնահատմամբ՝ ավտորիտար նպատակներ ունեցող քաղաքական շարժումները Եվրոպայում և Հյուսիսային Ամերիկայում ուժեղանում են, իսկ նրանց վերջնական նպատակը իշխանության գալն ու այն պահպանելու հնարավորություն տվող պայմանների ստեղծումն է։
Բարոն առանձնահատուկ ուշադրություն է դարձրել Ֆրանսիայում սպասվող նախագահական ընտրություններին, որոնցում, ըստ հարցումների, առաջատարն է ծայրահեղ աջ ուժերի ներկայացուցիչ Մարին Լը Պենը։ Նախարարը հայտարարել է, որ ժողովրդավարության հակառակորդները օգտագործում են ֆրանսիական հասարակության ներսում առկա տարաձայնությունները, դրանց թվում՝ միգրացիայի, պետության աշխարհիկ բնույթի և իսրայելա-պաղեստինյան հակամարտության հարցերը՝ ատելությունն ու լարվածությունը բորբոքելու համար։
Որպես օտարերկրյա միջամտության օրինակներ՝ նա հիշատակել է իսրայելական մի ընկերության գործունեությունը, որին կասկածում են սոցիալական ցանցերում կեղծ ֆրանսիական հաշիվներ ստեղծելու մեջ՝ Գազայի հատվածում պատերազմի վերաբերյալ հասարակական կարծիքի վրա ազդելու նպատակով, ինչպես նաև Ադրբեջանի հասցեին հնչած մեղադրանքները Նոր Կալեդոնիայում մահաբեր անկարգությունների ժամանակ լարվածություն հրահրելու վերաբերյալ։
Առանձին անդրադառնալով X սոցիալական ցանցի սեփականատեր Իլոն Մասկին՝ Ֆրանսիայի արտգործնախարարը հայտարարել է. «Իլոն Մասկը համացանցում եվրոպացի առաջնորդների դեմ լայնածավալ հետապնդման արշավներ է կազմակերպում՝ իր հարթակում բովանդակության վիրուսային տարածումն օգտագործելով քննարկումների վրա ազդելու համար»։
Նախարարը միաժամանակ Ռուսաստանին, Չինաստանին, Իրանին և ԱՄՆ-ում MAGA շարժման կողմնակիցներին մեղադրել է Ֆրանսիայում բողոքի ցույցերի ֆոնին թշնամական նարատիվներ տարածելու մեջ։ Վերջին շաբաթներին դպրոցականները, ուսանողները և արհմիութենական ակտիվիստները շրջափակել էին ուսումնական հաստատությունները և դուրս էին եկել ցույցերի՝ պահանջելով ուսուցման պայմանների բարելավում։ Ըստ Բարոյի՝ այս իրադարձությունները օգտագործվել են այնպիսի մեկնաբանություններ առաջ մղելու համար, որոնք չեն արտացոլում ցուցարարների պահանջները։
Անցյալ շաբաթ Մասկը և ԱՄՆ նախագահ Դոնալդ Թրամփը իրենց հերթին մեկնաբանել էին ֆրանսիական բողոքները՝ դրանք կապելով զանգվածային միգրացիայի հետ և ավելի քիչ ուշադրություն դարձնելով մասնակիցների հնչեցրած պահանջներին։
Բարոն ընդգծել է, որ ֆրանսիական իշխանությունները մտադիր են հակազդել օտարերկրյա միջամտությանը՝ անկախ դրա աղբյուրից։ Նրա կարծիքով՝ ազգային ինքնիշխանության պաշտպանությունը պահանջում է թույլ չտալ արտաքին ազդեցություն երկրի քաղաքական գործընթացների վրա։
