Երբ կառավարությունն ուզում է եկամտային հարկի ավելի նվազ չափ սահմանել, դա հասկանալի է, բայց միաժամանակ դա ուզում են փոխհատուցել մասնավոր տրանսֆերտները, ինչպես նաեւ գյուղացիական տնտեսություններում ձեւավորվող եկամուտները հարկելու ճանապարհով: Այս մասին, NEWS.am-ին հայտնեց ԱԺ նախկին պատգամավոր, տնտեսագետ Վարդան Բոստանջյանը՝ անդրադառնալով ՊԵԿ-ի ներկայացրած գաղափարին, որը ենթադրում է անցնել եկամուտների համատարած հայտարարագրման սկզբունքին:
«Բոլոր դեպքերում հասկանալի է, որ դա որոշակի իմաստով ռիսկային տարրեր է պարունակում պայմանավորված այն հանգամանքով, որ մասնավոր տրանսֆերտները ոչ այլ ինչ են, քան օտար ափերում աշխատող, չարչարվող մարդկանց կողմից այստեղ իրենց ընտանիքի անդամներին առաջնահերթ, անհետաձգելի, կենցաղային ամենակենսական խնդիրները լուծելու համար ուղարկված միջոցներ: Հիմա այդ միջոցների հարկումը, ըստ էության, պետք է հիմնավորել:
Իմ կարծիքով դա հիմնավոր չի կարող լինել, առավելեւս այն պարագայում, որ անուղղակի ձեւով դա կարող է նպաստել, որ տրանսֆերտների օրինական ու տեսանելի հոսքը խիստ պակասի: Մյուս կողմից բոլոր այն մարդկանց մոտ, որոնք Հայաստանում օգտվում էին դրսից ուղարկվող գումարներից, մեծանա արտագաղթելու մտադրությունը»,-հայտարարեց Բոստանջյանը:
Նա նկատեց, որ իհարկե, եթե կառավարությանը հաջողվի իրականություն դարձնել այդ նախագիծը, դա տնտեսության վրա դրական ազդեցություն ունենա. «Մենք առանց այդ էլ ունենք ֆինանսական սուղ միջոցներ, որոնք բավարար չեն: Մենք միջոցներ ենք փնտրում այդ ծախսերը հոգալու համար: Այդ առումով, տնտեսության համար հաստատ վատ չի լինի: Բայց ամենակարեւորը, որ դա չբերի վատ հետեւանքների»:
Տնտեսագետը չբացառեց, որ դա կարող է սոցիալական բողոքի լուրջ ալիք բարձրացնել հանրապետությունով մեկ. «Բանն այն է, որ տրանսֆերտներից օգտվողների ճնշող մեծամասնությունը ըստ էության, շատ փոքր շրջանառություն ունեցող մարդիկ են, եւ նրանց մոտ այդ հնարավորությունների պակասը ավելի կխեղդի: Դա բնականաբար, սոցիալական դժգոհության առիթ է դառնալու»,-հայտարարեց Բոսջանջյանը:
Ավելի վաղ NEWS.am-ը հայտնել էր, որ ՊԵԿ-ը շրջանառության մեջ է դրել մի գաղափար, որի համաձայն, 2020 թվականից եկամտային հարկի (23 տոկոս) պոտենցիալ վճարող են դառնալու 18-65 տարեկան ՀՀ բոլոր քաղաքացիները: Այսինքն սրանով պետք է հարկվեն նաեւ դրսից եկող մասնավոր տրանսֆերտ ստացողները, հասարակ գյուղացիները, բոլոր ինքնազբաղված անձինք:
Այդ նպատակին է ուղղված նաեւ ID-քարտերը կուտակիչ դարձնելու մեխանիզմը, որը թույլ կտա պարզել, թե որքան են կազմում մարդու եկամուտները, որից էլ հարկ կգանձվի: Ըստ էության, մարդիկ պետք է ինքնուրույն հարկային հայտարարագիր ներկայացնեն եւ վճարեն եկամտային հարկ:
Այս առնչությամբ, ՊԵԿ նախագահ Դավիթ Անանյանը «Ռադիոլուր»-ին ասել է. «Այո, այդ գումարը, որը մարդը արտագնա աշխատանքի ժամանակ վաստակել է, ուղարկել է, պետք է որպես եկամուտ հայտարարագրվի, ու դրա հասանելիքը պետք է պետությունը ստանա: Եթե անձը, որն այդ եկամուտը ստացել է, դրսում արդեն հարկվել է, ապա պետք է մեզ ներկայացվեն տեղեկանքները, մենք հաշվի պետք է առնենք այդ հարկը, հանենք տարբերությունը եւ ապա հարկենք մեր օրենքով»: