Սաուդյան Արաբիայի, Հորդանանի, ԱՄԷ-ի, Թուրքիայի, Կատարի, Եգիպտոսի, Ինդոնեզիայի և Պակիստանի արտաքին գործերի նախարարները համատեղ դատապարտել են Իսրայելի պաշտպանության և ազգային անվտանգության նախարարներ Իսրայել Կացի և Իտամար Բեն-Գվիրի հայտարարությունները՝ Գազայի հատվածից պաղեստինցիների վերաբնակեցման ծրագրերի վերաբերյալ։

Համատեղ հայտարարության մեջ նախարարները պաղեստինցիներին իրենց հողից հարկադրաբար տեղահանելու մեխանիզմներ ստեղծելու առաջարկները անվանել են միջազգային իրավունքի սկզբունքների, ներառյալ միջազգային մարդասիրական իրավունքի, կոպիտ խախտում և անմիջական սպառնալիք պաղեստինյան ժողովրդի օրինական ու անքակտելի իրավունքներին։

Հայտարարության առիթ են դարձել Իսրայելի կառավարության երկու ներկայացուցիչների նախաձեռնությունները։ Բեն-Գվիրը հինգշաբթի ներկայացրել է մի ծրագիր, որը նախատեսում է պաղեստինցիների զանգվածային արտագաղթ Գազայից՝ «կամավոր արտագաղթ» անվանմամբ։ Նա առաջարկել է ստեղծել առանձին պետական գերատեսչություն և հայտարարել, որ մտադիր է առաջ տանել նախաձեռնությունը, եթե ընտրություններից հետո իր կուսակցությունը պահպանվի իշխող կոալիցիայում։

Դրանից մեկ օր առաջ Իսրայելի պաշտպանության նախարար Իսրայել Կացը հայտարարել էր, որ Գազայից պաղեստինցիների զանգվածային դուրսբերմանը նպաստելու ծրագրերը մնում են օրակարգում։ Ըստ նրա, նախաձեռնությունը, որը նախկինում առաջարկել էր ԱՄՆ նախագահ Դոնալդ Թրամփը, միայն «սառեցվել» էր, բայց չէր չեղարկվել։ Կացը նաև խոսել էր այն մասին, որ Իսրայելը պատրաստ է կազմակերպել պաղեստինցիների ելքը ցամաքով, ծովով և օդով։

Համատեղ հայտարարության մեջ ութ երկրներն ընդգծել են, որ մերժում են պաղեստինցիների տեղափոխման ցանկացած փորձ կամ ծրագիր՝ թե՛ օկուպացված պաղեստինյան տարածքի ներսում, թե՛ դրա սահմաններից դուրս՝ անկախ օգտագործվող հիմնավորումներից կամ ձևակերպումներից։ Նրանք նաև զգուշացրել են լուրջ հետևանքների մասին, եթե հարկադիր տեղահանման կոչերը վերածվեն պաշտոնական քաղաքականության կամ կոնկրետ գործողությունների։

Իսրայելցի նախարարների հայտարարությունները հնչել են Իսրայելում խորհրդարանական ընտրություններից առաջ, որոնք նշանակված են հոկտեմբերի 27-ին։ Բեն-Գվիրն արդեն հայտարարել է Գազայի բնակիչների «կամավոր արտագաղթի» յոթնամյա ծրագրի մասին։

Միաժամանակ Իսրայելում ԱՄՆ դեսպան Մայք Հաքաբին հայտարարել է, որ Վաշինգտոնը չի աջակցում Գազայից պաղեստինցիների հարկադիր դուրսբերման ծրագրին։