News
Լրահոս
News
Երկուշաբթի
Ապրիլ 22
Տեսնել լրահոսը

Արարատի մարզպետ Գարիկ Սարգսյանը շարաշահում է իր պաշտոնեական լիազորությունները՝ իր դեմ ներկայացված հայցի քննությանն ուղարկելով մարզպետարանի իրավաբանին։ Այս մասին NEWS.am—ին ասաց զրպարտության համար մարզպետի դեմ հայց ներկայացրած՝ Արտաշատի բժշկական կենտրոնի նախկին տնօրեն Սոկրատ Հախվերդյանի փաստաբան Դիանա Գրիգորյանը։

«Դատարանն այժմ քննում է մեր հայցն ընդդեմ Գարիկ Սարգսյանի՝ զրպարտություն համարվող տեղեկությունը հերքելու և վնասի փոխհատուցման պահանջների մասին։ Մենք հայցը ոչ թե մարզպետի դեմ ենք ներկայացրել, այլ Գարիկ Սարգսյանի, այսինքն, այս հայցով պատասխանողը պաշտոնատար անձ չէ, մինչդեռ ինքը դատարան էր ուղարկել մարզպետարանի իրավաբանին, ինչը կոպտագույն սխալ է։ Դատարանը հետաձգեց նիստը՝ ժամանակ տալով Գարիկ Սարգսյանին պատշաճ ձեւով ներկայացուցիչ ուղարկելու համար»,– ասաց Դիանա Գրիգորյանը։

Փաստաբանի խոսքով, Գարիկ Սարգսյանն այս կերպ վատնում է մարզպետարանի ռեսուրսներն ու փորձ անում ճնշում գործադրելու դատարանի վրա. «Ենթադրում եմ, որ ինքը ՔՊ–ական է, դատարան է ուղարկում մարզպետարանի իրավաբանին՝ փորձ անելով ճնշել դատարանին, քանի որ նորից եմ ասում՝ մեր հայցում հստակ գրել ենք Գարիկ Սարգսյան, մարզպետի դեմ չենք մենք հայց ներկայացրել»։

Այս գործով հաջորդ դատական նիստը նշանակված է ապրիլի 26–ին։

Նշենք, որ սա միակ հայցը չէ ընդդեմ Գարիկ Սարգսյանի։ Քաղաքացիական դատարանում այս պահին Գարիկ Սարգսյանի դեմ ներկայացված է 6 հայց։

Տպել