Մամուլում տարածված տեղեկատվությունը, թե «ԱՅ ԷՄ ՋԻ գրուպ» ՓԲԸ-ն գոյություն չունի՝ իրականությանը չի համապատասխանում. այդ կազմակերպությունը կա, պարզապես արտադրանքի որոշակի ուշացում է եղել՝ պայմանավորված իր տեխնիկական խնդիրներով: Այս մասին, այսօր՝ մայիսի 3-ին, լրագրողների հետ հանդիպման ժամանակ նշել է Տնտեսական զարգացման եւ ներդրումների նախարար Տիգրան Խաչատրյանը՝ անդրադառնալով այն լուրերին, որ հեռուստացույցներ արտադրող գործարանը, որի բացմանը եղել է վարչապետ Նիկոլ Փաշինյանը, իրականում գոյություն չունի:
«Կառավարության նախորդ նիստի ժամանակ ես զեկուցում էի, որ այդ կազմակերպությանն արտոնություններ տան, եւ դա առիթ հանդիսացավ, որ այդ հարցի կապակցությամբ եւս մեկ անգամ պարզաբանում տրվի: Վերջին օրերի ընթացքում առիթ եմ ունեցել ճշտելու, որ ամեն ինչ իր ընթացքի մեջ է, այդ արտոնությունը հենց դրա համար էր, որ դեպի Հայաստան ներկրվող մասերը, որոնք պետք է օգտագործվեն արտադրանքի մեջ, ներկրվեն արտոնություններով: Շուտով մեկ ամիսը չգերազանցող ժամկետում մենք կունենանք առաջին արտադրանքը: Անձամբ կխնդրեմ, որ հատուկ լրատվամիջոցներին տեղեկացնեն, որ այդ մտահոգությունները փարատվի»,- ընդգծեց նախարարը:
Նշենք, որ դեռեւս 2018թ. դեկտեմբերի 5-ին վարչապետ Նիկոլ Փաշինյանը մասնակցել էր Մերձավանում «Այ Էմ Ջի գրուփ» ՓԲԸ-ի՝ կենցաղային տեխնիկայի արտադրության գործարանի բացմանը: Ընկերությունը տարեկան պետք է արտադրի 126 հազար միավոր կենցաղային տեխնիկա՝ հեռուստացույց, լվացքի մեքենա, օդափոխիչ, սառնարան եւ տեխնիկա:
