ԱՄՆ դեսպանությունը NEWS.am-ի խնդրանքով մեկնաբանել է ամերիկյան մամուլում տեղ գտած հրապարակումները, ըստ որոնց սենատոր Լինդսի Գրեմն արգելափակել է Հայոց ցեղասպանության ճանաչման մասին Սենատի բանաձեւը Սպիտակ տան խնդրանքով:
NEWS.am-ի հարցմանն ի պատասխան դեսպանությունյունից հայտնեցին, որ իրենք ծանոթ են հրապարակումներին: «ԱՄՆ դեսպանությունը տեսել է ձեր հիշատակած հրապարակումը։ Խնդրո առարկա բանաձեւը ընթացքի մեջ գտնվող օրենսդրական գործընթացի մաս է, եւ այս պահին մենք ձեռնպահ կմնանք մեկնաբանելուց:
Միացյալ Նահանգների դիրքորոշումն այս հարցի շուրջ չի փոխվել․ մենք սգում ենք Օսմանյան կայսրության վերջին տարիների տեղահանություններին ու կոտորածներին զոհ գնացած 1,5 միլիոն հայերի համար եւ ամեն տարի հիշատակի տուրք ենք մատուցում, որպեսզի պատմության այս մութ գլուխը երբեք մոռացության չմատնվի»,- ասված է դեսպանության հայտարարության մեջ:
Հիշեցնենք, որ ըստ Axios պարբերականի, երբ սենատորը դուրս է եկել Թուրքիայի նախագահ Ռեջեփ Էրդողանի հետ հանդիպումից հետո, Սպիտակ տան աշխատակիցը նրան խնդրել է Սենատ վերադառնալ եւ արգելափակել բանաձեւը:
