«Հայաստան» համահայկական հիմնադրամի նախկին ղեկավար Արա Վարդանյանի խափանման միջոց կալանքն այսօր փոխվել է։ Դատարանը որոշում է կայացրել նրան կալանքից ազատել 10 մլն դրամ գրավի դիմաց։ Այս մասին NEWS.am-ին հայտնեց Վարդանյանի փաստաբան Լուսինե Սահակյանը:
Նա այսօրվա ընթացքում ազատ կարձակվի:
Հիշեցնենք, որ հոկտեմբերի 9-ին, «Համահայկական հիմնադրամի» նախկին տնօրեն Արա Վարդանյանին ՀՀ քրեական օրենսգրքի 179-րդ հոդվածի 3-րդ մասով մեղադրանք է առաջադրվել՝ յուրացման համար։ Մեղադրանք առաջադրելու համար պատրվակ է հանդիսացել հիմնադրամի ենթակա ձեռնարկություններից մեկի արտադրանքը հասցեատերերին մատակարարված չլինելու հանգամանքը։ Երևանի ընդհանուր իրավասության դատարանի որոշմամբ՝ Արա Վարդանյանի նկատմամբ որպես խափանման միջոց կիրառվել էր կալանավորումը։
Արա Վարդանյանը իրեն մեղավոր չի ճանաչել, հայտարարելով որ իր նկատմամբ քաղաքական հետապնդում է իրականացվում:
