Վարակվածների ընդհանուր թիվը Հայաստանում հասել է 1808-ի։ Ապրիլի 27-ին՝ ժամը 11-ի դրությամբ նոր կորոնավիրուսով վարակվելու 62 նոր դեպք է գրանցվել: Հիվանդությունների եւ վերահսկման եւ կանխարգելման ազգային կենտրոնի տվյալով՝ ապաքինվել է 848 մարդ, վերջին մեկ օրում՝ 15-ը, 29 պացիենտ մահացել է:

Կառավարական հանձնաժողովի նիստում պարետ Տիգրան Ավինյանն անդրադարձել է կորոնավիրուսային վարակի տարածումը կանխարգելելու միջոցառումներին և հետագա անելիքներին: Քննարկվել են համաճարակաբանական խնդրի կառավարելիության, տեղաշարժի և տնտեսական գործունեության սահմանափակումների մեղմման հնարավորություններ և այլ հարցեր: Նիստի արդյունքներով պարետի  որոշումները կհրապարակվեն հետագայում:

«Լուսավոր Հայաստան» կուսակցության ղեկավար Էդմոն Մարուքյանն առաջարկում է մայիսի համար յուրաքանչյուր ընտանիքի հատկացնել 100 հազար դրամ, իսկ յուրաքանչյուր թոշակառուի տալ հավելյալ մեկ ամսվա թոշակ: Ֆեյսբուքի ուղիղ եթերում նա պնդել է, որ այդ փողը կա: Նա նշեց, որ կառավարության աջակցության 14 միջոցառումների վերաբերյալ «Լուսավոր Հայաստանն» իր գրասենյակում խորհրդատվություն է տրամադրում քաղաքացիներին, քանի որ, ըստ նրա, այնքան բարդ է ծրագրերին դիմելը, չափանիշներին համապատասխանելը, որ հատուկ կարիք կա աջակցել, որ մարդը կարողանա դիմել:

Մարալիկի առողջության կենտրոնի տնօրեն Անուշ Հովսեփյանը  համաձայն չէ Առողջապահության նախարարի այն պնդման հետ, որ իրենք չեն հետեւել նախարարության ցուցումներին: Բժշկուհին, որը նույնպես վարակվել է կորոնավիրուսով, NEWS.am-ին ասել է, որ  իրենք հսկել են գրեթե 250 հոգի արտերկրից եկած մարդու, ջերմաչափել են, բայց վարակումը եղել է տեղական դեպքից, թեեւ կատարել են բոլոր հրահանգները։ Ի՞նչ է` մենք ուզո՞ւմ էինք հիվանդանալ,- հարցրել է նա:

Աշխարհում արդեն կա COVID-19 կորոնավիրուսով վարակված 3 միլիոն պացիենտ: Զոհերի թիվը հասել է 207 հազարի, իսկ 881,5 հազար մարդ առողջացել է: Հիմա բուժվում է գրեթե 2 միլիոն պացիենտ, 57,5 հազարի կամ նրանց 3 տոկոսիվիճակը գնահատվում է ծանր կամ ծայրահեղ ծանր: ԱՄՆ-ում վարակակիրների թիվը մոտենում է միլիոնին. այնտեղ գրանցվել է  55,5 հազար մահ: Իսպանիայում գրանցվել է 226 հազար վարակակիր եւ 23 հազար մահ, Իտալիայում՝ 198 հազար վարակակիր եւ 26 հազար 600-ից ավելի մահ:

Արցախի արտակարգ իրավիճակների պետական ծառայության տնօրեն Լեւոն Մնացականյանն այսօր եղել է խորհրդարանում։ Նա մասնակցել է ապրիլյան պատերազմի քննիչ հանձնաժողովի նիստին։ Հիշեցնենք, որ Ապրիլյան քառօրյայի ժամանակ Լեւոն Մնացականյանը  Պաշտպանության բանակի հրամանատարն էր:

Ապրիլյան պատերազմի ժամանակ հայկական կողմը կորցրել է 400 հեկտար, ունեցել ենք 75 զոհ, որից 35-ը՝ ժամկետային զինծառայող, հանձնաժողովի նիստից հետո հայտնել է Լեւոն Մնացականյանը։ Այնուհանդերձ, գեներալ-լեյտենանտն ընդունել է, որ իր մասով բացթողում եղել է, որը նոր հրամանատարը հաշվի է առնելու։ Բայց ճակատագրական սխալ չի եղել, քանի որ հայկական կողմը հաղթել է, պնդել է նա։

Եկել ենք եզրակացության, որ տարին հեռավարով ենք ավարտելու, առկա լսարանային դասեր չեն լինելու եւ մայիսին եւս հեռավար կրթությունը շարունակվելու է, Ֆեյսբուքյան ուղիղ եթերում հայտարարել է կրթության  նախարար Արայիկ Հարությունյանը։ Փոխադրական քննություններ չեն լինելու, ասել է նա։ Հարությունյանի խոսքով՝ քննությունների ժամանակացույցը պայմանավորված է նաեւ զորակոչի հետ։

Ընդունելության համար դիմորդները 1 քննություն են հանձնելու եւ մինչեւ ամսի 30–ը նախարարը կհայտնի, թե որ մասնագիտությունից։ Քննությունները կլինեն հուլիսի առաջին տասօրյակում։ Նախարարը ներկայացրել է նաեւ մագիստրատուրայի եւ ասպիրանտուրայի ընդունելության ժամանակացույցը։

Ատելության խոսքը կազմաքանդում է հասարակությունը,  Ազգային Ժողովի Մարդու իրավունքների պաշտպանության եւ հանրային հարցերի հանձնաժողովում օմբուդսմենի տարեկան զեկույցի քննարկմանը  նշել է հանձնաժողովի նախագահ Նաիրա Զոհրաբյանը: Եթե մենք այս օրինակով չունենանք հստակ պատասխանատվություն, ապա պետք է արձանագրենք, որ մեր ընդունած օրենքներն էլ են մեռելածին եւ որեւէ հետեւանք չեն ունենալու, ասել է Զոհրաբյանը:

Նույն խնդրի մասին խոսել է նաեւ Մարդու իրավունքների պաշտպանը։ Արման Թաթոյանը նշել է, որ խոսքի ազատության մասին խոսելիս առաջին խնդիրը որ գալիս է, վիրավորանքն է, համացանցում տիրող վիճակը, ատելությունը: Նա կոչ է արել քաղաքացիներին չներքաշվել նման քննարկումների մեջ, որովհետեւ դա վտանգավոր է նրանով, որ կարող է իրական կյանք տեղափոխվել:

Չնայած մարտի կեսերից արտակարգ դրության մեջ ենք, այնուամենայնիվ, ամեն ինչ աճել է, Ֆեյսբուքի իր էջում գրել է նախկին վարչապետ Հրանտ Բագրատյանը: Վկայակոչելով վիճակագրության կոմիտեի՝  2020-ի առաջին եռամսյակի տվյալները, Բագրատյանը նշել է, Տնտեսական ակտիվության ցուցանիշն աճել է 4 տոկոսով, արդյունաբերությունը՝ 8.7, գյուղատնտեսությունը 4.5, ծառայությունները՝  ինչպես միշտ՝ 5.5 տոկոսով։ Գներն իջել են, իսկ միջին անվանական աշխատավարձն աճել է 9.2 %։ Երբեք մեր ժողովուրդն այսքան լավ չի ապրել, պնդում են ԱՎԿ «պաշտոնական» թվերը», գրել է նախկին վարչապետը:

Երբ մենք հայտարարում էինք, որ պետք է ներողություն խնդրելով, կսկիծով, ինքներս մեզ դատափետելով  փակենք Ծիծեռնակաբերդի հուշահամալիր տանող ճանապարհները, շատ կոնկրետ շրջանակներից եղան շատ կոնկրետ մեկնաբանություններ, որ ահա, այս ապազգային, պրոթուրքական իշխանությունը հատուկ փակում է Ծիծեռնակաբերդը, որպեսզի մոռացության մատնի Ցեղասպանության պատմությունը եւ այլն: Այս մասին Ֆեյսբուքի ուղիղ եթերում վաղ առավոտյան հայտարարել է վարչապետ Նիկոլ Փաշինյանը:

Հանգստյան օրերին հայ հանրության քննարկման հիմնական թեման Արտուշ պապն էր: Հիշեցնենք, 82-ամյա ծերունին ապրիլի 24-ի ցերեկը եկել էր Ծիծեռնակաբերդի հուշահամալիր՝ այցի, սակայն մուտքի մոտ ոստիկանները թույլ չէին տվել վեր բարձրանալ: Ավելի ուշ, ասելով, թե կատարում են վարչապետի հրանանգը, ոստիկանները մեքենայով, գիշերվա 2-ին Արտուշ պապին ուցեկցել էին Մեծ Եղեռնի հուշահամալիր: Պապը, որը ցեղասպանության բոլոր զոհերին համարում է իր անձնական կորուստը, դարձել է հեռուստառեպորտաժների հերոս, նրան այցելել են պաշտոյնաներ, սոցիալական օգնության խոստումներ տվել:

Այսօր առավոտյան 9-ն անց 52-ին Ճգնաժամային կառավարման ազգային կենտրոն ահազանգ է ստացվել, որ Չարենցավանի բնակարաններից մեկում հրդեհ է բռնկվել: Հրշեջները հրդեհը մեկուսացրել են  12-ն անց 25-ին:

NEWS.am-ը պարզել է, որ բնակարանում վարձով ապրում է Ծովինար Սաֆարյանը 5 անչափահաս երեխաների հետ։ Ընտանիքը հայտնվել է փողոցում։ Նրա կրտսեր զավակներից մեկն այրվածքներ է ստացել եւ այժմ հիվանդանոցում է։

Այսօր մի քանի սողանք ու քարաթափում է տեղի ունեցել։ 13:16-ին Ճգնաժամային կառավարման ազգային կենտրոն տեղեկություն է ստացվել, որ Լոռու մարզի Դարպաս գյուղի Հարավսլավական տնակներ տանող երկրորդային փողոցում տեղի է ունեցել սողանք։ Հողաշերտի փլուզումից  վնասվել են ճանապարհի հենապատերը՝ մոտ 30 մետր:

Սողանք է տեղի ունեցել նաեւ Լոռու մարզի Շահումյան համայնքում։ Պարզվել է, որ համայնքի հարեւան սարալանջից մոտ 200 խմ հողախառն զանգված պոկվել եւ մոտ 25 մ սահելով մոտեցել է փողոցի աջակողմյան հենապատին՝ ամբողջովին փակելով փողոցը։ Առկա է եւս մոտ 200 խմ հողախառն զանգվածի տեղաշարժի վտանգ։ Ի դեպ, անցած 7 օրվա ընթացքում գրանցվել է փլուզման 11, քարաթափման 6, սողանքի 1 դեպք:

ԱՄՆ դոլարի փոխարժեքը նախորդ օրվա համեմատ նվազել է 0.09 դրամով եւ կազմել 479.58 դրամ: Եվրոյի փոխարժեքն աճել է 3.36 դրամով ու հասել 520.20 դրամի, բրիտանական ֆունտի փոխարժեքն աճել է 3.67 դրամով ու կազմել  596.21 դրամ, իսկ ռուսական ռուբլու փոխարժեքն աճել է 0.07 դրամով ու հասել  6.45 դրամի։

Ապրիլի 28-ին օրվա երկրորդ կեսին Հայաստանի մարզերի մեծ մասում, նաեւ երեւանում սպասվում են կարճատեւ անձրեւներ եւ ամպրոպ, հնարավոր է կարկուտ: Առաջիկա գիշերը մայրաքաղաքում սպասվում է +6+8, վաղը ցերեկը՝ +15+17։