Ադրբեջանի նախագահ Իլհամ Ալիեւն այսօր ասել է, որ ոչ ոք չի կարող իր վրա ազդել կապված այն բանի հետ, որ ադրբեջանցի «ակտիվիստները» փակել են Լաչինի միջանցքը։
Նրա խոսքով՝ այն, ինչ կատարվում է Լաչինի միջանցքում, «օրինական իրավունք է. «Ոչ ոք չի կարող ազդել մեզ վրա։ Կարող են լինել զանգեր, ինչ-որ հայտարարություններ, բայց պետք չէ դրանց նշանակություն տալ։ Մենք այդ զանգերին պատասխանում ենք պարզապես քաղաքական կոռեկտությունից դրդված։ Բայց սա դույզն-ինչ չի փոխի մեր դիրքորոշումը»։
Ալիեւը կրկին հայտարարել է Հայաստանի նկատմամբ իր տարածքային հավակնությունների մասին. «Արեւմտյան Ադրբեջանը (ադրբեջանական իշխանությունները դրա տակ նկատի ունեն Հայաստանի Հանրապետության ողջ տարածքը) մեր պատմական հողն է։ Դա հաստատում են բազմաթիվ պատմական փաստաթղթերը, պատմական քարտեզները, մեր պատմությունը։ Մեզ անհրաժեշտ է համատեղ ջանքերով Արեւմտյան Ադրբեջան վերադառնալու հայեցակարգ մշակել»,- ասել է նա։
Նշենք, որ Արցախն ու Հայաստանը կապող Լաչինի միջանցքը բացելու կոչով Իլհամ Ալիեւին զանգահարողների թվում են Ֆրանսիայի նախագահ Էմանուել Մակրոնը եւ ԵՄ արտաքին գործերի եւ անվտանգության քաղաքականության գերագույն հանձնակատար Ժոզեպ Բորելը։