Սուրբ Գրիգոր Լուսավորիչ բժշկական կենտրոնից մանրամասներ չեն հայտնում դեկտեմբերի 26-ի գիշերը 7 տարեկան տղայի մահվան դեպքից՝ հորդորելով սպասել դատաբժշկական փորձաքննության պատասխանին։

«Շատ ցավալի դեպք է տեղի ունեցել, սպասենք դատաբժշկական փորձաքննության պատասխանին»,– NEWS.am-ի հետ զրույցում ասաց Սուրբ Գրիգոր Լուսավորիչ ԲԿ-ի մամուլի խոսնակ Աիդա Կարապետյանը։

Ավելի վաղ armLur.am-ը հայտնել էր,   որ գիշերը ժամը 1։00–ի սահմանում, Սուրբ Գրիգոր Լուսավորիչ հիվանդանոցում 7 տարեկան տղա երեխա է մահացել։

Մահացած տղայի հարազատները կոտրել են հիվանդանոցի վերակենդանացման բաժանմունքի ապակիները, մայրը փորձել է պատուհանից ցած նետվել, սակայն բժիշկները կանխել են։

Նշենք, որ օրեր առաջ էլ 3, 5 տարեկան աղջիկ երեխայի մահվան դեպք էր գրանցվել   «Մուրացան» համալսարանական հիվանդանոցային համալիրի մանկական բաժանմունքում։

Հիվանդանոցից NEWS.am-ին հայտնեցին, որ 3,5 տարեկան երեխայի հարազատները դիմել էին այդ հիվանդանոց, երբ երեխան արդեն ծայրահեղ ծանր վիճակում էր։

«Երեխայի մոտ բժիշկները նախնական ախտորոշել են «սեպտիկ շոկ» եւ շուրջ 40 րոպե վերակենդանացման միջոցառումներ արել, սակայն կյանքը փրկել չի հաջողվել»,– հայտնեցին հիվանդանոցից։

Նշենք, որ դեպքի առթիվ Քննչական կոմիտեում նախաձեռնվել է քրեական վարույթ։