նախընտրելի դարձնելԵրկրապահ կամավորականների միությունում (ԵԿՄ) հերքում են տեղեկությունները, թե ԵԿՄ Կենտրոն տարածքային կազմակերպությունում խմորումներ են սկսել, որի արդյունքում ավելի քան 50 անդամներ պատրաստվում են հանձնել իրենց վկայականները եւ դուրս գալ ԵԿՄ-ից:
ԵԿՄ ղեկավար Մանվել Գրիգորյանի խորհրդական Վարդան Վարդանյանը NEWS.am-ի հետ զրույցում նշեց, որ նորմալ գործընթաց է, երբ ինչ- որ կազմակերպություն մարդիկ ընդունվում կամ դուրս են գալիս, բայց կառույցից դուրս գալու ոչ թե 50, այլ 2 դիմում էլ չի եղել:
«Ավելին` մեծ հոսք կա դեպի ԵԿՄ, ինչպես նաեւ ԵԿՄ-ի պատանի եւ երիտասարդական ակումբներ: Ընդ որում, ԵԿՄ կենտրոնի կառույցին վերջերս 100 հոգի է անդամագրվել: Նրանց շարքերում կան տղաներ, որ նախկինում չեն անդամակցել ԵԿՄ-ին, առանձին հ/կ-ներ են եղել հիմա որոշել են միանալ ԵԿՄ-ին:
Նա անդրադարձավ նաեւ ԵԿՄ Կենտրոնի կառույցի ղեկավարի փոփոխությանը (Մանվել Գրիգորյանի հրամանով ԵԿՄ Կենտրոն կառույցի 4 ամիս առաջ ընտրված ղեկավար Էդիկ Գյումրյանը հեռացվել է եւ նրա փոխարեն այդ պաշտոնում ժամանակավորապես նշանակվել Ռոբերտ Նազարեթյանը), նշելով, որ ԵԿՄ վարչության նախագահն իրավունք ունի աշխատանքի կազմակերպման արդյունավետությունից ելնելով փոխել ղեկավարին:
«Մանվել Գրիգորյանը խոսել է կառույցի նախագահի հետ եւ ներկայացրել, որ կառույցն այն արդյունավետությամբ չի աշխատում, որքան մյուս կառույցները: Իսկ կառույցի ղեկավարն էլ ընդունել է իրականությունը: Ցանկանում եմ ասել, որ սա անձերի խնդիր չէ: Ներկա պահին ժամանակավոր պաշտոնակատար է նշանակված, մինչեւ կառույցից առաջարկ կլինի, թե ով կղեկավարի այն»,- մանրամասնեց Վարդան Վարդանյանը:
Հարցին, թե ի՞նչ առումով արդյունավետ չի աշխատել հեռացված ղեկավարը, նա պատասխանեց. «ԵԿՄ-ն ունի կանոնադրական պարտավորություններ, միջոցառումներ են անցկացվում, զոհվածների ընտանիքներին սոցիալական, իրավական աջակցություն է ցուցաբերվում, ռազմահայրենասիրական միջոցառումներ են անցկացնում: Եթե նայենք նույնիսկ հեռավոր մարզերում ակտիվ միջոցառումներ են անցկացնում, իսկ կենտրոնը վերջերս այդ առումով իսկապես ակտիվ չէր»:
Հիշեցնենք, որ ավելի վաղ հայտնի էր դարձել, որ ԵԿՄ Կենտրոն տարածքային կազմակերպության շուրջ 50 անդամներ պատրաստվում են հանձնել իրենց վկայականները եւ դուրս գալ ԵԿՄ-ից: ԵԿՄ-ից դուրս գալու որոշման պատճառը ԵԿՄ վարչության նախագահ Մանվել Գրիգորյանի անունից փոխանցված մեսիջն է եղել, որի համաձայն նա հրամայել է` կառույցի ղեկավարի պաշտոնից հեռացնել 4 ամիս առաջ ղեկավար ընտրված Էդիկ Գյումրյանին (նա շարունակում է իր հոր` Արտաշես Գյումրյանի աշխատանքը) եւ այդ պաշտոնում ժամանակավորապես նշանակել Ռոբերտ Նազարեթյանին: Այս որոշումը դուր չի եկել երկրապահներին եւ նրանք քննարկում են կազմակերպությունից հեռանալու հարցը:
Ի դեպ, NEWS.am-ի տեղեկություններով, ներկայումս բանակցություններ են ընթանում ԵԿՄ ղեկավարների ու Գյումրյանների միջեւ եւ շատ հնարավոր է, որ վերջնարդյունքում պաշտոնապես հրաժարականի դիմումներ չներկայացվեն:
Պատրաստեց Տաթեւ Մեսրոպյանը
