Գրեթե երեք տասնամյակ մահապարտների խցում անցկացրած ամերիկացի Ռիչարդ Գլոսիպը կրկին կկանգնի դատարանի առաջ, հաղորդում է Associated Press գործակալությունը։

Նրա գործով նոր դատավարությունը կսկսվի սեպտեմբերի 28-ին՝ չնայած քրեական հետապնդման դադարեցմանը հասնելու պաշտպանական կողմի փորձերին։

63-ամյա Գլոսիպն ազատ է արձակվել գրավի դիմաց 2026 թվականի մայիսին, երբ ԱՄՆ Գերագույն դատարանը չեղարկել է նրա մեղադրական դատավճիռը։ 1997 թվականին ձերբակալությունից ի վեր նա առաջին անգամ է հայտնվել ազատության մեջ։

Գլոսիպը մեղավոր էր ճանաչվել իր պետի՝ Օկլահոմա Սիթիի մոթելներից մեկի սեփականատեր Բարի Վան Թրիզի սպանությունը կազմակերպելու մեջ։ Մեղադրանքի վարկածով՝ հանցագործությունը կատարվել էր պատվերով. Վան Թրիզին բեյսբոլի մահակով ծեծելով սպանել էին։ Մեղադրանքի գլխավոր վկան դարձել էր հանցակից Ջասթին Սնիդը, որը համաձայնել էր ցուցմունք տալ Գլոսիպի դեմ՝ փոխարենը դատախազության կողմից իր նկատմամբ մահապատժից հրաժարվելու պայմանով։

Այնուամենայնիվ, Գերագույն դատարանը հանգել է այն եզրակացության, որ դատախազությունը լուրջ խախտումներ է թույլ տվել։ Դատավորները պարզել են, որ մեղադրող կողմը Սնիդին թույլ է տվել կեղծ ցուցմունք տալ իր հոգեկան վիճակի մասին, թեև դատախազները գիտեին, որ այդ տեղեկությունը չի համապատասխանում իրականությանը։ Դատարանի կարծիքով՝ դա խախտել է արդար դատաքննության Գլոսիպի սահմանադրական իրավունքը։

Չնայած դատավճռի չեղարկմանը, Օկլահոմայի գլխավոր դատախազ Գենտներ Դրամոնդը որոշել է հասնել նոր դատավարության՝ առաջին աստիճանի սպանության մեղադրանքով։ Միաժամանակ, դատախազությունն այլևս չի պահանջում մահապատիժ։

Մահապարտների խցում գտնվելու տարիների ընթացքում Գլոսիպի համար մահապատժի ինը ամսաթիվ է նշանակվել։ Նա այնքան մոտ է եղել դատավճռի իրականացմանը, որ երեք անգամ կերել է մահապատժից առաջ դատապարտյալների համար նախատեսված վերջին ընթրիքը։ 2015 թվականին նրան արդեն տեղավորել էին մահացու ներարկումների սենյակի հարևանությամբ գտնվող խցում, սակայն վերջին պահին նահանգի նահանգապետը կասեցրել էր մահապատիժների իրականացումը՝ դրանց ընթացակարգերը ստուգելու համար։

Գլոսիպը շարունակում է պնդել իր անմեղությունը։ Վերջին տարիներին նրան աջակցել են մի շարք հայտնի հասարակական գործիչներ, նրանց թվում՝ Քիմ Քարդաշյանը։ Այժմ նրա գործը կրկին կքննի դատարանը, որը պետք է որոշի՝ արդյոք նա մեղավոր է այն սպանության մեջ, որի համար գրեթե 30 տարի անցկացրել է մահապատժի սպասումով։