նախընտրելի դարձնելԼոռիի մարզի Քարաբերդ համայնքն ունի շուրջ 200 բնակիչ, որոնց 90 տոկոսից ավելին ծերեր են, գյուղն այսօր չունի գոյատեւման տարրական պայմաններ, դպրոց ու մանկապարտեզ, ճանապարհներն անբարեկարգ են, չի գործում նաեւ գյուղ-քաղաք միջհամայնքային տրանսպորտը:
NEWS.am-ի Լոռիի թղթակցի հետ զրույցում Քարաբերդի գյուղապետ Յուրիկ Շալյանն ասաց, որ իրենց համայնքը մարզի ամենաաղքատ համայնքն է: Նրա խոսքով, Խորհրդային միության տարիներին լքված գյուղը վերականգնվել է 1990 ականներին, որտեղ այսօր մնացել են միայն ծերերը, դպրոց չունենալու պատճառով երիտասարդները թողել հեռացել են քաղաք:
«Ահագին մարդիկ կային, որ երեխաներ ունեին, ու եթե էստեղ դպրոց լիներ, իրենք չէին հեռանա գյուղից, հիմա մնացել են ծերերը»,-ասաց նա, հավելելով, որ ընդամենը մի 4-5 երիտասարդ ընտանիք կա, որ երեխաներ ունեն:
Քարաբերդ համայնքում հիմնական զբաղմունքը խոշոր եղջերավոր անասնապահությունն է, գյուղը հաճախակի ենթարկվում է գայլերի հարձակման, նախորդ տարի գրանցվել է նմանատիպ 18 դեպք, հոշոտվել` 26 ձիու քուռակ:
Քարաբերդ համայնքի խնդիրները շատ են, առաջինը գյուղապետը կարեւորում է անբարեկարգ ճանապարհի հարցը, գյուղապետաանի շենքի բացակայությունը, գյուղապետարանն այժմ կենտրոնացած է գյուղապետի սեփական տնակում: Յուրիկ Շավելյանի խոսքով, գյուղում ոչ մի ծրագիր չի իրականացվում, քանի որ համայնքը ոչ դպրոց ունի, ոչ մանկապարտեզ, ոչ էլ այդ տարիքի երեխաներ: «Էսօրվա դրությամբ արդեն եթե դպրոց էլ սարքեն, դժվար թե ներգաղթ ունենանք, խելքս չի կտրում»,-ասաց գյուղապետը:
Գյուղում չի գործում նաեւ տրանսպորտը, գյուղացիները շուրջ 6 կմ ոտքով ճանապարհ են իջնում, լավագույն դեպքում խնդրում են համագյուղացիներին, ովքեր մեքենա ունեն, որ իրենց հասցնեն մինչեւ մայրուղի, որտեղից էլ պատահական մեքենաներով գնում են քաղաք: «Գյուղում նույնիսկ մի խանութ չկա: Պետական պաշտոնյանները եւս գյուղ քիչ են այցելում, վերջին անգամ գյուղ ացելել է պատգամավոր Կարեն Սարիբեկյանը, մարզպետի այցին էլ գյուղում սպասում են»,-ամփոփեց գյուղապետը:
Էդվարդ Արզումանյան
