ԱՄՆ-ը ռազմական ռեսուրսների լուրջ սպառում է ապրում և ի վիճակի չէ շարունակել ակտիվ ռազմական ներկայությունը Մերձավոր Արևելքում, հայտարարել է Իրանի Իսլամական հեղափոխության պահապանների կորպուսի պաշտոնական ներկայացուցիչ, բրիգադային գեներալ Հոսեյն Մոհեբբին, հաղորդում է Irna-ն։

Մարքեզի նահանգի Արաք քաղաքում լրագրողների հետ զրույցում նա Հորմուզի նեղուցն անվանել է առանցքային գործոններից մեկը, որն ազդում է ներկայիս դիմակայության զարգացման և նոր համաշխարհային կարգի ձևավորման վրա։

Մոհեբբիի գնահատմամբ՝ Իրանն օգտագործում է իր աշխարհագրական առավելությունները, օպերատիվ հնարավորություններն ու ռազմական ներուժը՝ ռազմավարական ծովային այդ զարկերակը վերահսկելու համար։

ԻՀՊԿ ներկայացուցիչը հայտարարել է նաև Պարսից ծոցում ամերիկյան ռազմածովային խմբավորման զգալի կրճատման մասին։ Նրա պնդմամբ՝ մինչև հակամարտության ակտիվ փուլի սկիզբը տարածաշրջանում տեղակայված էր 30-40 մարտական ամերիկյան նավ, մինչդեռ այժմ ամերիկյան նավատորմի հիմնական ուժերը, ենթադրաբար, հեռացել են Իրանի ափերից հարյուրավոր կիլոմետրեր։

Մոհեբբին նշել է, որ ծովում ռազմական նավերի երկարատև ներկայությունը զգալի նյութական և լոգիստիկ ռեսուրսներ է պահանջում: Նրա գնահատմամբ՝ սպառումը վերաբերում է ոչ միայն ամերիկյան ռազմական տեխնիկային, այլև զինծառայողների բարոյահոգեբանական վիճակին։