Չինաստանում առաջարկվել են նոր կանոններ, որոնք նպատակ ունեն ապահովել անչափահասների կողմից ինտերնետի անվտանգ օգտագործումը, հաղորդել է «Սինհուա»-ն։

Ուղեցույցի նախագծը պատրաստել է Չինաստանի ինտերնետ-տեղեկատվության պետական վարչությունը։ Փաստաթուղթը հրապարակվել է ուրբաթ և ներկայացվել հանրային քննարկման, որը կտևի մինչև հոկտեմբերի 17-ը։

Նախագիծը նախատեսում է մի շարք պահանջներ ինտերնետ-ծառայություններ մատուցողների համար։

Մասնավորապես, առաջարկվում է սահմանափակել անչափահասների հասանելիությունն այն սոցիալական ցանցերին, որտեղ նրանք կարող են շփվել անծանոթ մարդկանց հետ, «վիրտուալ մտերիմ հարաբերությունների» ծառայություններին, ինչպես նաև այն առցանց հարթակներին, որոնք կարող են կախվածություն առաջացնել կամ վնաս հասցնել երեխաների ֆիզիկական և հոգեկան առողջությանը։

16 տարեկանից փոքր անչափահասների համար առաջարկվում է սահմանել հատուկ «անչափահասների ռեժիմ» սոցիալական ցանցերից և արհեստական բանականության վրա հիմնված հարթակներից օգտվելիս, եթե դրանք կարող են ազդել օգտատերերի կոգնիտիվ զարգացման վրա։

Նախագծի համաձայն՝ այդպիսի ռեժիմը պետք է ապահովի երեխաների ֆիզիկական կամ հոգեկան առողջությանը վնաս հասցնել կարողացող տեղեկատվության հայտնաբերումն ու տարածման սահմանափակումը։

Բացի այդ, այն նախատեսում է անչափահասների անձնական տվյալների պաշտպանություն, ինտերնետային կախվածության կանխարգելման միջոցներ և աջակցություն ծնողներին և այլ օրինական ներկայացուցիչներին՝ ինտերնետի օգտագործման վերահսկման պարտականությունները կատարելու հարցում։

Չինական իշխանությունները նաև առաջարկում են զարգացնել և արտադրել երեխաների համար հատուկ խելացի սարքեր՝ հաշվի առնելով նրանց ֆիզիկական և հոգեկան զարգացման առանձնահատկությունները։ Խոսքը վերաբերում է նաև ինտերնետային տեխնոլոգիաների և ծառայությունների մշակմանը, որոնք պետք է նպաստեն անչափահասների անվտանգ և առողջ զարգացմանը։

Չինաստանում ինտերնետի զարգացման վերաբերյալ 57-րդ վիճակագրական զեկույցի տվյալներով՝ 2025 թվականի դեկտեմբերի դրությամբ երկրում եղել է 6-19 տարեկան ավելի քան 200 մլն ինտերնետ-օգտատեր։

Չինաստանի տեղեկատվական և հաղորդակցային տեխնոլոգիաների ակադեմիայի փոխտնօրեն Վան Չժիցինը նշել է, որ սոցիալական ցանցերի ազդեցությունը երեխաների հոգեկան առողջության, վարքագծի և անվտանգության վրա ավելի նկատելի է դառնում։ Նրա խոսքով՝ վերջին տարիներին ավելի շատ երկրներ և տարածաշրջաններ են ուսումնասիրում անչափահասների կողմից սոցիալական ցանցերից օգտվելու համար ավելի բարձր տարիքային սահմանափակումներ սահմանելու հնարավորությունը։

Վան Չժիցինի կարծիքով՝ չինական նախագիծն արտացոլում է ինտերնետում երեխաների պաշտպանության ուժեղացման համաշխարհային միտումը և առաջարկում է կարգավորման մոդել՝ հաշվի առնելով Չինաստանի ազգային առանձնահատկությունները։