Իսպանիայի վարչապետ Պեդրո Սանչեսի՝ նոյեմբերի 29-ին արտահերթ համապետական ընտրություններ անցկացնելու որոշումը կարող է խոչընդոտել ԵՄ երկարաժամկետ բյուջեի շուրջ մինչև տարեվերջ համաձայնության հասնելուն։ Այս մասին, հղում անելով սեփական աղբյուրներին, հայտնում է Politico պարբերականը։

Ավելի վաղ Financial Times-ը գրել էր, որ Գերմանիան, Նիդերլանդները, Շվեդիան, Դանիան, Ավստրիան և Ֆինլանդիան վերջնագիր են ներկայացրել Եվրամիության նոր երկարաժամկետ բյուջեի վերաբերյալ՝ պահանջելով այն կրճատել հարյուրավոր միլիարդ եվրոյով։

Politico-ն նշում է, որ Իսպանիայում սպասվող ընտրությունները նվազեցնում են մինչև տարեվերջ բյուջետային համաձայնության հասնելու հավանականությունը։ Ըստ ԵՄ անանուն դիվանագետներից մեկի՝ նախընտրական գործընթացները շեղելու են ուշադրությունը և խոչընդոտելու են փոխհամաձայնության որոնմանը։

Եվրամիության անդամ երկրները պետք է մինչև ընթացիկ տարվա ավարտը համաձայնեցնեն 2028–2034 թվականների յոթնամյա բյուջեի վերջնական տարբերակը։ Նոր նախագիծն աշնանը պետք է ներկայացնի Իռլանդիան, որը 2026 թվականի երկրորդ կեսին նախագահում է ԵՄ Խորհրդում։

Յոթնամյա բյուջեն սահմանում է ԵՄ հիմնական ծախսերը առաջիկա յոթ տարիների համար։ Դրա վերջնական հաստատման համար անհրաժեշտ է անդամ բոլոր պետությունների համաձայնությունն ու Եվրախորհրդարանի հավանությունը։ Քաղաքական համաձայնության հասնելուց հետո ազգային իշխանություններին լրացուցիչ ժամանակ է հարկավոր՝ մինչև 2028 թվականի բյուջետային փուլի մեկնարկը համապատասխան օրենսդրությունն ու ծրագրերը նախապատրաստելու համար։